China-in Uyghur te nawrtawm zui zel

China chuan Uyghur academic langsar tak chu ‘state security tana pawi’ tia puha manin lung in-ah a khung mek.
Rahile Dawut hi kum 2018 daih tawha thubuai siamsak niin thiamloh chantir a ni ta niin US -a inbun Dui Hua Foundation rights group-te chuan an sawi a. Kum 57-a upa hian thla hmasa khan ngenna a siam chu hnawlsakin a awm an ti bawk.
China chu Xinjiang-a Muslim ethnic group Uyghur mite laka ‘crime againsts humanity’ kalpuia puhin a awm reng a ni.
Human rights group-te chuan China hian Uyghur maktaduai khat chuangte chu tun hnaiah ‘re-education camps’ tia a vuahah khalh lutin an duh lo chungin zirtirna a kalpui mek an ti bawk.
Chu mai bakah mi sang chuang lung inah a khung an ti bawk a. “Professor Rahile Dawut hremna hi nunrawnna a ni a, Uyghur-te tan chuan channa nasa tak a ni” tiin John Kamm, executive director, Dui Hua Foundation chuan a sawi a. China sorkar chu chhuah zalen vat turin a ngen bawk.
Rahile Dawut fanu Akeda Pulati chuan a u chu nitin ngaihtuaha hun a hman thu a sawi a. “Ka nun dan bawhchhiatna a nei lo chungin dam chhung hrehawm tuarin lung in a khung mek a ni a. China hian zahngaihna lantir se, pawisawi lo ka nu hi chhuah zalen turin ka ngen a ni” tiin a sawi.
Dawut chungchang hi December 2018 atang khan a ruka ngaihtuah tawh niin state security tana hlauhawm tia puh a ni a. Chinese sorkar pawhin dam chhung tang tura lung ina khung tiin a sawi zui bawk.
Dawut hi Uyghur folklore leh traiditions lama mithiam niin man a nih hma chuan Xinjiang University College of Humanities a thawk a ni.
Kum 2007 khan Ethnic Minorities Research Centre a thawhna university-ah dinin Xinjiang hmun hrang hrangah an thawk zui a. US, UK leh Harvard leh Cambridge ah pawh lecture a pe tawh bawk.
Dui Hua te chuan Dawut hi kum 2016 hnu atanga Uyghur intellectuals man leh hrema lung ina khung mek tam tak zinga tel tiin an sawi bawk.
China chu Xinjiang-a genocide kalpuiah US leh ram hrang hrang tena an puh niin, human rights group Amnesty International leh Human Rights Watch-te pawhin China chu ‘crime against humanity’ kalpuia an puh a ni bawk.
China-ah hian Uyghurs maktaduai 12 vel an awm a, a tam berte chu Xinjiang-a cheng niin official a Xinjiang Uyghurs Autonomous Region (XUAT) tih niin China hmar thlang lama awm a ni.