Pope Francis-an ralthuam siamtute dem

Pope Francis chuan weapons industry-te chu Russia indona kalpui meka Ukraine mipuite ‘martar’ a siamtu tia sawiin, tunah pawh ralthuam pek that leh duh loh chuan an tawrhna a ti nasa zual zel dawn tiin a sawi bawk.
Hei hi Francis hian Poland-in tun hnaia Ukraine hnenah ralthuam pekluh a tum tawh loh thu a sawina chhanna nia ngaih a ni bawk.
Francis chuan Vatican in diplomatic lama a hmalakna chuan rah tha a chhuah thei lo chu pawi a tih thu a sawi a. Russia-Ukraine indona kalpui mek phenah weapons industry-te an awm a ni a ti bawk.
Ukraine mipui te chu ‘martar te’ tia sawiin a tirah chuan ram hrang hrang ten Ukraine hnenah ralthuam an pe a, tunah erawh an ralthuam pekte an lakir leh a ti bawk a. Francis chuan, tunhma atang tawhin weapons industry chu ‘merchants of death’ tia a lo sawi tawh thu sawiin, chutihrual erawh chuan ram tinte chuan mahni inveng turin dikna an nei a ni, a ti bawk.
“Tunah ram thenkhat ten Ukraine hnena an ralthuam pekte an lakir leh mek a, pek zui an tum tawh lo a ni. Hengin a thlen tur chu Ukrainian-te martar tam zawk a thlen dawn a, chu chu a tha lo a ni” tiin Poland Prime Minister Mateusz Morawieck-an Poland-in sumdawnna lama inhmuhthiam lohna avanga Ukraine nena ralthuam an pek tawh loh tur thu a sawi a chhanna a ni.
“Ukrainian martar-te hi kan ngaihthah thei lo” tiin Francis chuan a sawi a. “A theih dan ang angin he buaina hi kan chinfel a ngai a ni” tiin a sawi bawk.
Hei bakah hian Marseille a tlawhnaah Francis chuan Europe chu migrants tam zawk pawm turin a ngen bawk.