Philippines ramah chuan purunsen man chu thla kalta khan kg ah 700 pesos ($12.80, Rs 972 vel) a ni a. Sa man aiin a sang zawk a, ni tin inhlawhfa chhawrna man ai pawhin a sang zawk.
-- Advertisement --
Tun hnai deuhah purunsen man a tlahniam deuh chungin consumer hausa te tan lo chuan lei ngam meuh a la ni lo tiin Rizalda Maunes, central Cebu city a Pizzeria neitu chuan a sawi.
“Ni tin purunsen kg hnih hu vel kan lei thin a. Tunah chuan kg chanve bak kan lei ngam meuh lo a ni” tiin Maunes chuan a sawi a.
“Kan customer te pawhin an hrethiam a, a chhan chu restaurants te chauh ni lo chhung tin te purunsen hmangtute chuan a harsat zia an hriat vang a ni,” tiin a sawi bawk.
Filipino te tan chuan purunsen hi a lo va awm theih loh tluk niin an chawhmeha pawimawh ber pakhat niin a man sang hian cost of living sanzia a pholanga ngaih a ni bawk.
Philippines-ah hian thil man engkim man eitur atanga fuel man sang te inflation chuan thla kalta khan kum 14 chhunga a san ber a tawng a ni.
Presdient Ferdinand Marcos Jr, agriculture secretary ni bawk chuan food price sang chu ’emergency dinhmun’ tiin a sawi a. Marcos hian tun thla tir lam khan supply tihsan nan purunsen leh aieng chi te ram dang atanga chawkluh tur a ti bawk.
Mithiam te chuan Philippines economy inhawng leh chuan demand a tisang an ti a, a hma kumah khawchin danglam nasa tak avangin ei leh bar tharchhuah lamah harsatna a tawk nasa a purusen pawh a ni tho.
“Nikum August thla khan Department of Agriculture chuan thlai chin tharchhuah lamin harsatna a tawk dawn an lo ti lawk tawh a. Philippines chu thlipui turu pahnih laiin nuaiin chu chuan thlai chin a tichhe nasa hle” tiin Nicholas Mapa, ING Bank a senior economist chuan a sawi a.
“Economy a insiam rem chak bawk si avangin demand a sang chak em em bawk si a ni,” tiin Mapa chuan a sawi.
Ei tur man sang hian Cebu khawpuia kawtthler food stall te chu a khawih hle bawk a, heng hmun te hi tualchhung leh tourists te tamna hmun a ni a.
Fried vegetables, sa leh seafood te chu purunsen nen vinegar sauce siamah chiahin eitur lar ber ber a ni reng a.
“Kan dish-ah te hian purunsen hi tihmakmawh a ni a. Kan eitur siam al te tithlum deuh tur leh a tituitu atana kan hman ber a ni” tiin stall neitu pakhat Alex Chua chuan a sawi.
“Purunsen man sang tihhniam nana sorkarin ram dang atanga chawkluh a tum hian min ti lawm a. Thil man sang tur tihhniam nana hma an lak chhunzawm zel pawh kan beisei a ni” tiin a sawi.
April Lyka Biorrey chuan Iloila city a pasal a neihnaah pangpar a ken tur aiah purunsen thil khawm a keng.
“Ka pasal tur hnenah pangpar aiin purunsen ka keng thei ang em ka ti a, a chhan chu inneih zawhah pangpar chu a vuai anga kan paih mai dawn” tia sawiin Biorrey chuan, “Eng vangin nge purunsen thilkhawm ka ken mai loh ang? Inneih zawh hnuah pawh hmantlak a la ni dawn tho si a,” tiin a sawi.
Chuti khawpa hlu chu smuggler ho ten an hmuh hmaih hauh lo bawk a. Tun thla tir lam khan Philippines Airlines crew member 10 te chu an luggage bag-ah purunsen 40 kg dan kalha chawk luh tuma puh niin chhui chian mek an ni.
Purunsen vang chuan Marcos, agriculture secretary nia food production tihsan tuma thutiam chu a chaih buai hle bawk a. Lawmaker thenkhatte chuan Marcos chu midang ruat mai turin an tur bawk.
Thil man sang chungchangah Philippines Senator Grace Poe chuan, “A hmain sugar man a sang a, tunah purunsen man a sang leh a. Chokaa mamawh engkim hi a man a san thu kan hre zui vek dawn emaw tih maitur a ni,” tiin a sawi.
Marie-Anne Lezoraine, Kantar Worldpanel consultancy chuan climate change chu Philippines food security tana hlauhawm a nih thu a sawi thung a.
“Consumer tam tak te ni tin mamawh lei ngai ten sum an nei tam lo. Climate change-in harstana a siama thil man a san zel chuan Philippines a mi tam ber te chuan harsatna namen lo an tawk dawn a ni” tiin Lezoraine chuan a sawi a.
Mahse Malpa chuan sorkar berin purunsen ram dang atanga tam zawk a chawk luh chuan thil man a ngelngheh zui mai theih a beisei thung a.
“Mahse a hun tak hi a duhawm lem lo va February thla hi tualchhunga purusen tharchhuah vanglai tur chu a ni thung a. Tualchhunga thar leh ram dang atanga chawkluh a inrual chuan a man a tlahniam chak hle mai thei,” tiin a sawi.