Pathianni zan Premier League inkhel

Pathianni zan Premier League inkhel
Chelsea barakhaihtu Aston Villa
Second half tir lam minute 58-a Malo Gusto hnawhchhuah a nih tuarin an khelmualah sikhat faiin Chelsea an tlawm a, Aston Villa chakna goal hi minute 73-a Ollie Watkins thawh niin, tunhnai Europa Con-ference League qualifying round-a Hibernian an luhkhung tum khan Wat-kins hian hat-trick a lo siam tawh bawk.
Mauricio Pochettino team khan Gusto red card hmuh hmain goal thun theihna hun remchang vawi duai lo nei mah se an hun tha neih goal-ah an chantir zo tlat lo a; Nicolas Jackson leh Raheem Sterling-te chuan pakhat leh pakhat inhmachhawnah Villa kee-per chetha Emiliano Martinez an pel zo ngang lo a, Enzo Fernandez pawhin a chance neih tha lutuk goal ban sirah a thawnchhuak ve bawk.
Blues hian an league game hmasa paruk atangin point nga chauh an la rut a; Pochettino an rawih hmaa an home league match khelh hnuhnung 14-ah pawh vawihnih chiah chakin, goal 11 bak an khung zo lo a, Argentine coach rawih hma leh rawih hnu a danglam thui teh chiam dawn lo pawh a ni mai thei!
Chak zawk awm lohna north London derby
Arsenal khelmualah Tottenham Hotspur chuan Son Heung-min goal hnih tihluh hmangin 2-2 draw an hlawhchhuak a, beiseilawk ang ngeiin north London derby nung tak a ni leh.
Spurs hian tum hnih si an phur hmasa a, Son hian sut ve vein, Emirates Stadium-a goal hmasaber hi minute 26-a Bukayo Saka shot Spurs defender Cristian Romero-a’n an lam goal-a a khakluh palh niin, chawlhlawk dawnah South Korea international Son chuan mikhual siphurh a sut hman.
Second half tir lam minute 54-ah Mikel Arteta team-in hmahruaina hun tha nei lehin, Romero handball chu Video Assistant Referee endiktir a nih hnuah penalty chawitir a ni a, Saka chuan Gunners hmahruai nawnna goal a chhuihlut.
He penalty goal an thah fel chauh tihah inhliam Declan Rice thlaktu half-time substitute Jorginho chuan Maddison lakah a ball chan hlohin, ani hian Son tan a chhawpsak a, South Korean bawkin mikhual siphurh a sut leh a, goal dang luhbelh loin north London derby chu 2-2-in a tawp.
Tun kha Spurs manager a nih hnuah Ange Postecoglou tan north London derby a hmachhawn vawikhatna niin, away-ah lehnghal derby draw a hlawhchhuak nghal thei kha a tan result chhe tak a ni hran lo ang!
Liverpool 3-1 West Ham United
Liverpool kechheh a dik zel a, Pathianni zan Premier League-ah hnehna chang lehin, inelna hrang hranga an game khelh hnuhnung vawi 18-ah tlawm an pumpelh fai vek!
Pathianni zan Anfield club inkhelah Mohamed Salah chuan minute 16 an khelh tlin rualin goal hmahruai penalty atangin a chhuihlut a, kha penalty kha Nayef Aguerd tihtluk atanga a hlawhchhuah a ni nghe nghe.
Chawlhlawk dawnah Jarrod Bowen chuan West Ham siphurh sut ve lehin, Vladimir Cou-fal-a ball vawrh tha zet chu a tauhlut a, half time-ah 1-1-in an intluk phawt.
A hnu lawkah Cur-tis Jones chuan mualneitu team hmahruai nawnna goal khung zui lehnghal mah se offside avangin pawm a ni lo.
Second half tir lam minute 60-ah Darwin Nu-nez a rawn inlar ve leh ta a, Alexis Mac Allister-a ball chhawpsak chu remchang lo zetin goal-ah a chantir a, season kal laia Reds tana a goal li thunna a ni tawh.
Hammers game nalh viau mah se an siphurh sut turin clear-cut chance han tih tur siamchhuah an harsat a; minute nga chauh awm tawhah Diogo Jota chuan Virgil van Dijk-a thawhrah hmangin chiang zawka mualneitu team chakna goal a thawh zui ve leh ta a ni.
West Ham boss David Moyes hi Premier League game-a Liverpool a hmachhawntum 24-ah a chak lo a, chu chu team pakhat laka manager chak loh hnem ber joint record niin, Manchester United laka Harry Redknapp tlawm zat nen a intluk.
Liverpool leh West Ham United hi Ningani Europa League-a inlan ve ve tur niin, chumi hre reng chuan Moyes leh Jurgen Klopp-te khan Pathianni zanah an game hnuhnungber atangin player pakua an thlak ve ve.
West Ham kha chak se Premier League season bul an tan that ber record an nihrualpui leh chiah dawn a, chu chu kum 1999-2000 chhunga game ruk atanga point 13 an thawhchhuah kha a ni.
Premier League table-ah Liverpoo-in pahnihna an luah a, hmahruaitu ni mek Manchester City nen point hnihin an inthlau.