Madrid derby-ah Atletico chungnung

Madrid derby-ah Atletico chungnung
Pathianni zan derby-ah mualneitu team chakna goal hnih thawhtu Alvaro Morata a langsar a, Atletico Madrid chuan 3-1-in Real Madrid an hneh.
Metropolitano stadium inkhelah Atletico forward Morata hian minute lina lekah Samuel Lino cross atangin goal hmahruai a tauhlut a; minute 18 an khel tling tihah Antoine Griezmann chuan Saul Niguez-a cross atangin sihnih faia Diego Simeone-a team hmahruaina goal a tauhlut ve leh.
Spanish giants beilet tan Toni Kroos chuan chawlhlawk hma minute nga la awmah an si-phurh pakhat a sut then a, second half phurawm zawk nghak thei turin mikhual team-in chawlhlawk an hman theih phah.
Second half an tan phat tihah Morata bawkin a club hlui lakah he match-a a goal hnihna leh chiang zawka Atletico chakna goal ni zui ta a thawh belh a, ti hian, season kal laia La Liga game nga a khelh atangin goal nga a tilut tling der tawh a, La Liga season thara Real Madrid 100% chak tluang lai a tihtawpsak bawk.
Pathiannia an point thum thawhchhuah hmangin Atletico chuan table-ah pangana an luah chho a; Real erawh tun season-a an point hloh vawikhatna tuarin pathumnaah an thu a, an chungah hmahruaitu Barcelona leh Girona an chuang.
Pathianni hma zawnga La Liga Madrid derby an khelh hnuhnung 14-ah vawikhat chiah Atletico an chak a, Real kha tun season-a an tumpuite la hneh fai vek an nih bawk avangin Metro-politano stadium inkhelah pawh khan home team kha rinkai lo zawk an ni leh chiang hle a, mah-se, beisei loh result an hlawh-chhuak ta tlat a ni.
Kumin nipui laia Real a zawm hnua langsar zui nghal em em England midfielder Jude Bellingham chetfuh loh zan leh an team tlawm zan a innang a, hun tawp dawna Angel Correa laka a foul avangin yellow card pek a ni nghe nghe.
Kum 20 mi Bellingham hian inelna hrang hranga a inlan hmasak vawiruakah a club thar tan goal ruk thun tlingin, chuti fakaua lut fuh pawhin Real Madrid player a nih hnua a tlawm vawi-khatna a pumpelh zo ta bik lo!