PSG chak zana inhliam Mbappe

PSG chak zana inhliam Mbappe
Achraf Hakimi leh Randal Kolo Muani goal khat ve ve thun baka Goncalo Ramos goal hnih thawh hmangin Paris St-Germain chuan Pathianni zanah sili faiin an mikhual Olympique de Marseille sawp mah se hlimlohna tur chhan pakhat an nei a, an star forward Kylian Mbappe chuan Leonardo Balerdi nen an intauhna lamah a khup a tina a, half-time hmaa khelmual chhuahsanin, October ni 4 Champions League away match-a Newcastle United an sut hunah a dam hman dawn em a hriat rih loh.
Pathianni zana an point thum hlawhchhuah hmangin French champion chuan Ligue 1 table-ah pathumna an luah chho a, season tir lam atanga hma-hruaitu ni tawh Stade Brestois lakah point hnihin an la hniam.
Luis Enrique team PSG hi September ni 15 khan Ligue 1 game-a Nice an mikhual tumin 3-2-in an lo tlawm tawh a, Pathianni zanah erawh an khelmuala chak loh nawn leh an tum lo tih tan phat atangin an lantir a, Morocco full-back Hakimi chuan minute riatna lekah free-kick atangin goal hmahruai a chhuihlut er zawk.
Chawlhlawk hnaih lamah Hakimi hian Muani tan siamsak ve lehin, tunthlatir lama PSG-in pound maktaduai 64.2 baka pound maktaduai 12.2 laia la pung leh thei tura Eintracht Frankfurt atanga an sengluh Muani hian a club thar tana a goal hmasaber a thun.
Inhliam Mbappe thlaktu substitute Ramos chuan second half-ah goal hnih thawh ve lehin, sikhat chauh an la chhuah lai khan Marseille lamin an siphurh sutna hun remchang hmu mah se Vitinha chuan goal kham a tihper.
A hma chawlhkar mai khan Marseille manager Marcelino chuan a hna atanga banna a thehlut a, head coach thar an lakluh hmaa PSG an luhkhung tum hian an tlawm chiang hle a ni.
Tun kha Ligue 1 season kal laia Marseille tlawm vawikhatna niin, table-ah pasarihna an luah a, point hnihin PSG an pha lo.
Inkhel dangah nikum runners-up RC Lens chuan season kal laia an vawikhat chakna nghakchhuak ve hramin, mikhual Toulouse lakah 2-1 hnehna an chang a, an chakna goal hi hun tawp dawna Morgan Guilavogui tihluh a ni.
Champions League group stage bul an tanna lamah Lens hian 1-1-in mualneitu Sevilla an inhnehtawkpui tawh bawk.