ADBBA Div-I Screening Basketball Tournament

September 20-29, 2023 chhung khan Aizawl District Basketball Association (ADBBA) Division I Screening Basketball Tournament chu Armed Veng Community Centre leh Hawla Indoor Stadium-a khelh niin, second division atanga first division kai tur zawnna a ni.
Second division-ah club 16 an awm a, chu’ng club-te chu league-a inkhelkualin first division kai tur an zawng a; pool paliah inthenin, pool tinah club pali zel an awm a; inkhel pawh a tangin a hmuh-nawm thin hle. First division kai ngei tum club-te inbuatsaihna a reiin a tha hlawm bawk a, mipui lam pawhin an hlut a, entu pawh an tam thin hle a ni.
September ni 27, 2023 quarter-final atangin inkhel en man a awm a, mi pakhat tan Rs. 50 niin, basketball ngaina mite an fuamkhawm nasa.
Main sponsor hi Mizoram State Sport Council niin, co-sponsor hi B. Lalawmpuii, Ward No IX AMC Councillor a ni. Zuia Photo & Art Works, Upper Republic leh E&M Pet Store, Chanmari Ramhlun Road-te’n an sponsor bawk.
Mizoram Basketball Associa-tion (MBBA) lamin tun hmaa ADBBA lo enkawl thin 1st division kha MBBA hnuaiah D-League tia hming thlaka a lak tak avangin ADBBA hian 2nd division club 16 awm zing atangin 1st division tur tun tournament hmang hian a siam ve leh ta a ni.
Mizoram basketball division inlalawn siamdanglam a nih avangin tun 2nd division club 16 awm atangin club pariain 1st division an kai ta a ni.
A lehpek atangin kal dan phung pangngaiin a kal leh thei tawh ang a, club pahnih emaw lek chauh 2nd division atang hian 1st division-ah an kai tawh ang.
LPS leh ADBBA thawhhona avangin quarter-final atangin LPS-in live hmangin a pechhuak char a, in lam atanga lo entute tan a awlsam phah hle a, chutih rualin a hmun ngeia entute an thahnem tho.
Semi-final game hmasa zawk-ah Chhinga Vengin Kanan chu 59-92-a hnehin final an lut a; Chal-tlangin RVL Pirates laka 65-73 hnehna changin final an lut ve bawk.
Final match hi karliamta Zirtawpni zan khan Hawla Indoor Stadium-ah Chhinga Veng leh Chaltlang Club-te’n an khel a, 76-67 hnehna nen Chhinga Veng an champion.
Champion trophy hi Juliana, Venghluiin a pa Thanghlupuia hriatrengna’na a donate a ni.