Leipzig muala tlawm pumpelh hram Bayern

Inrinni German Bundesliga inkhel pakhatah goal hnih chhuah zet chungin Bayern Munich chuan an siphurh an sut zo a, RB Leipzig muala 2-2- draw nen league khelh ruka point 14 hmuin table-ah pathumna an luah.
Kumin August thla German Super Cup-ah Leipzig hian sithum faiin Bayern hi an lo sawp tawh a, Inrinni zanah pawh Munich club hi tlawm leh mai thei dawnin an lang hman a, second half-a an siphurh sut zoin tlawm nawn an pempelh hram a ni.
He inkhelah hian mikhual team-in a tir lamah goal hmahruai thun theihna hun remchang neiin, Jamal Musiala chuan Janis Blaswich a enchhin hlawhchham a; a hnu rei vak loah Emil Forsberg chuan goal pawnah chhuihchhuakin, minute 20-ah Leipzig striker Lois Openda chuan mual-neitu team hmahruaina goal thunin Sven Ulreich dan zawh lohin a chhuihkual lut.
Minute ruk an khel tling leh tihah Belgian forward thawhrah atangin Castello Lukeba chuan Leipzig goal hnihna a thawh ve leh a, half time-ah sihnih faiin mualneitu team-in hma an hruai.
First half-a ha nei lo ang maia inlan Bayern-in hlauhawm zawkin second half bul an tan a, VAR kaltlanga endik a nih hnuah Leon Goretzka free-kick chuan Benjamin Heinrichs-a ban a fuh tih nemngheh niin, chumi hrinchhuah penalty atangin Kane chuan reigning champion siphurh pakhat zawk a sut then.
Bayern lam hian nawr chhunzawmin, Raphael Guerreiro leh Mathys Tel an hlauhawm viau hnu minute 70-ah Leroy Sane chuan counter-attack hmang-tangkaiin Bavarians goal hnihna a khung ve leh a; 2-2 a nih hnuah chakna goal thun tumin team pahnih innawrtawn viau mah se Blaswich leh Ulreich-te’n an huam chhung ve veah ‘solid goalkeeping’ an vawngnung tlat a, team pahnihin point an insem mai a ngai ta a ni.
Kha draw result hmang khan Bayern chuan Borussia Dortmund hmakhalhin Bundesliga table-ah pathumna an luah chho a, khelh rukah Leipzig erawh pangana an ni zui zel.
Harry Kane khan a club thar tana Bundesliga match a khelh hmasak vawiruk atangin goal riat a thun tling a, he league history-a match hmasa paruka goal khung hnember dawttu a ni der tawh.
England captain Kane hian kumin nipui thawt lai khan Tottenham Hotspur chhuahsanin Germany a pan a, Bundesliga champion tan inelna hrang hrangah goal kua a tilut tling tawh bawk.