Thikthu, engtin nge i tih ang?

I kawppui/bialpa kha a hmeichhe thiante bula a awmin nuam lo i ti thin em? Chutiang chu nangmah chauh i ni lo e, hmeichhe dang sang tam tak pawhin an ngaihzawng/kawppui te hmeichhe dang bula an awm hian him lo riaua inhriatna an nei thin.
Clinical psychologist Dr Kanan Khatau chuan, “Hmeichhe thikthu chhe lutuk chuan a hun kaltawhah a thikthu tichhe turin eng emaw a lo tawng tawh a ni duh hle a, a naupan laia a nu leh pate inkara thil thleng vang pawh a ni daih thei. An kawppui ten hmeichhe dang an kawm nel deuh ni a an hriat velah hlauhthawnna an nei nghal mai thin a ni, chutiang hmeichhe bula khawsak chu mipa tan a hahthlak thin hle a ni,” a ti.
Dr Kanan chuan hetianga kawppui ten hmeichhe dang an kawm kan hmuha nuam lo kan tih chuan kan rilru te zzp a, mahnia hrehawm ti ru tak si a awm ai chuan a tir atangin hrilh nghal mai tur a ni. A tira engmah sawi loh hian kan rilru nuam lo chuan lungawi lohna a hmu hma a, inhauhna leh a ruka boruak tha lo a inmung duh hle niin a sawi bawk.
Clinical psychologist Seema Hingoranny pawhin, “Kan rilru puthmang te chu upbeh tur a ni lo. Chutianga kan upbeh chuan keimahniah tawt up up a siam a, chu chuan puahchhuah hun a nei leh tho a, a puak chhuak leh chu a thawkna ta em em mai thin a ni. A tira tlema thikna awm ve kha thikthuchhe takah a chhuak thei a ni. Chutiang hunah chuan mipa chu mawhpuh ngawt tur a ni bik lova, chu chu chuan inhauhna chauh a thlen ang,” a ti.
Engtin nge thikthu chu i tih tak ang? Psychologist-te chuan i chaklohna lai inhriat a pawimawh niin an sawi a, kan thikthu te hi keimahni zawk him loa kan inngaihna atanga rawn chhuak niin an sawi. Chuvangin mahni mahni inhmangaih dan thiam hmasak a tul, an ti a ni.
Hetiang hunah hian i hmuh leh hriatah te innghat la, chutiang ni lova, ‘ta se,’ ‘mai ang a’ tih vela i rilru i ti hah vak vak a nih chuan i intihrehawm thlawn mai a ni. Chutiang a nih loh chuan thil tak tak leh i rinthu kha thliar hran thiam harsa i la ti thuai ang.
I thik zawng tak thil a awm a nih chuan thawk han la vang vang la, uluk takin ngaihtuah la, i thil hmuh leh hriatte te chu thik tham a ni tak meuh em, a evidence i neih te chu a rintlak em, tih te ngaihtuah ang che.