Kum 45 miin chin-up record siam

Chin-up an ti mai a, exercise lak dan hahthlak set mai, ban tha tih chak nana tha fahran mai a ni a, chunglama bar khamah uaiin, keiin lei a rap tur a ni lo va, tichuan kiu-ah ban tithlepin chunglamah an uai kang a, bar kham chungah khabe an dah chhuak a, chumi hnuah ban timarin an uai thla leh thin. Hetiang hian an tinawn deuh sek thin a ni.
Tichuan le, Colorado a cheng, Frank Sagona, kum 45, chuan darkar khatah chin-up hi vawi 1010 a tihman a, kum 12 chhung hetiang record lo ding tawh chu a rawn khum a, Guinness World Record thar a rawn siam ta a ni. A hmaa hetiang record chu 2011-a Stephen Hyland-a siam niin, ani hian darkar khatah chin-up vawi 993 a ti thei a ni.
Sagona chuan, “Hei hi thahrui leh rilru lam inenchhinna tha theihtawp a ni e,” a ti a, record siam tuma a inbuatsaihna lamah a tihrawl a tina lehnghal a, chu chuan a tiharsa lehzual niin a sawi bawk.
Sagona chuan, “Minute 44-na velah khan ka thawh a lian hman tawh hle a, mahse, khami ka pelh kha chuan ka tih thei dawn tak taka inrinna ka nei ta. Ka tihrawl hliam hian uai chhoh lam aiin uaithlak lamah harsatna min siam nasa a, record ka siam hnu lawkah khan ka luak nghe nghe a ni,” a ti.
Sagona chuan a record siam hi training-naa pui thintu a thianpa Mike Roumph tan a hlan a, Mike hian a record siam a hmuhpui hmain a boralsan ta si a, “He record hi keima tan chauh a ni lo, Mike hriatreng nan a ni e,” a ti.