Europe-ah pawh Real damna Bellingham

Cristiano Ronaldo leh Karim Benzema tihte awm loh hnua Real Madrid goal khung hna tlin taka thawk chho mek lei thar Jude Bellingham chuan Thawhlehni zan Champions League Group C-ah Los Blancos tan goal khung lehin, Naples khawpuiah 3-2-in mualneitu Napoli an hneh.
England midfielder Belling-ham hian tun season-a Champions League match hnih a khelh tawhah goal tilut ve vein, Thawhlehni zan phei kha chuan minute 34-a Real goal hnihna a thun bakah minute 27-a Vinicius Junior-a goal tur a siamsak bawk a, Real Madrid’s star player nihna kawng a zawh fuh zel.
Stadio Diego Armando Ma-radona inkhelah mualneitu team lamin goal hlawhchhuak hmasain, first half minute 19-ah defender Leo Ostigard chuan Italian champion Napoli hmahruaina goal a khung a; tarlan tak angin, si an phurh hnuah mikhual team-in goal hnihin an chhanglet a, half time-ah Spanish giants hian 2-1-in hma an hruailet hman.
Second half tir lam minute 54-ah thawkrim Napoli-in penalty hlawhchhuakin, a tirah referee Clement Turpin chuan Victor Osimhen shot a dan danah Nacho Fernandez-a foul avang khan penalty a ham nghal mai lo a, mahse, video assistant referee check hnuah French official chu khelmual sira ‘monitor’ an dah chu ennawn leh tura hrilh a ni a, penalty a ham ta chauh a ni.
Napoli tana penalty pet tur hian Piotr Zielinski a penchhuak a, home team siphurh sutna goal chhuihlutin 2-2 a ni.
Minute 78-ah Federico Val-verde ‘shot’ pui tak chuan goal kham fuhin, ball sawt kawi chuan Napoli goalkeeper Alex Meret-a hnungzang a tlak a, an lam goal-ah a sawtlut a, he own goal hmang hian La Liga team-in away-ah point thum hlu tak an hlawhchhuak leh a; ti hian, Carlo Ancelotti team hian khelh hniha point ruk hum chungin Group C hma an hruai a, Champions League group stage bul an tanna inkhelah sikhat faiin Union Berlin an lo hneh tawh a; tarlan tawh thin angin, kha chakna goal awmchhun kha England international Jude Bellingham-a thun a ni nghe nghe.
Napoli kha Champions League bika home game an khelh hnuhnung vawi 14-a tlawm nei lo chunga Real Madrid mikhual ni mah se Thawhlehni zanah an tlawm loh rei record an hum zo ta lo a, khelh hniha point thum hum chungin an group-ah pahnihna an ni a; point thum ve bawk neitu Sporting Braga laka 2-1 hnehna an lo chan tawh avangin Portuguese club lakah hian head-to-head tehnaah an sang zawk.
Thawhlehni zan Group C inkhel dangah sihnih phur hmasa zet chungin Braga chuan mualneitu Union Berlin lakah 3-2 hnehna an changlet a, Bundesliga team hian point la nei ve lo chungin table mawngphah an luah.