Thei leh thlai sawngbawl, vawnthat leh funna din

Thei leh thlai sawngbawl, vawnthat leh funna din
Sawrkar laipui Ministry of Commerce & Industry hnuaia Agricultural and Processed Food Products Export Development Authority (APEDA) kaltlanga Tuirial Airfield-a bun, thei leh thlai sawngbawlna, vawnthat leh funna hmun ‘Pack House for Fruits and Vegetables’ chu Ningani khan Agriculture minister C Lalrinsanga’n a hawng.
Minister sawi danin, RKVY atangin quintal 60 leng cold storage 6, thei leh thlai thar tamna khaw hrang hrangah bun tum a ni a. A dang pawh a tahtawla ruahman zel tum a ni. Ram neitu dik tak ten buh leh bal hlawk zawka an thar theih nan leh crop pattern siam danglam kawngah tan lak tum a nih thu leh kuthnathawktute thlai thar zawrhna tur thlenga ruahman tum a nih thu a sawi. Tharchhuah mai bakah food processing lamah pawh tan lak deuh deuh tum a ni tih a sawi.
Pack House hi loneitute thei leh thlai thar sawngbawlna, vawnthatna leh fun thatna tur a ni a. Mizoram sawrkar leh APEDA hian 2015 October 28 khan thawhdunna thuthlung an ziak a. CDAR ram hectare 1.2 huamchhungah kalpuiin, cheng nuai 944.69 sen a ni. APEDA-in nuai 800 tumin state sawrkarin nuai 144.69 a tum. PPP mode-a kalpui niin, CDAR hi project facilitator, coordinator & partner a ni a; Food & Agribusiness Strategic Advisory & Research (FASAR) leh YES Bank Ltd. chu project consultant an ni.