Record medal nena Asian Games khar India

Record medal nena Asian Games khar India
September ni 23 atanga October ni 8, 3023 chhunga Asian Games zawh fel takah India chuan he khawmualpui huap inelna liana medal a lak tam ber tum nen Games vawi 19-na a khar a, medal 107 zinga 28 chu gold niin, silver 38 leh bronze 41 nen Games hnu-hnungber 2018 Jakarta-a medal 70 a ruh nen chuan a inthlau hle a ni.
Hangzhou Games-a an dinhmun avangin India tan nakkum 2024 Paris Olympics-ah beiseina sang zawk a inmung chho nghal.
A pumpuia medal la hnem ber leh a thlengtu ni bawk China chuan gold medal 192, silver 106 leh bronze 66 rutin an medal lak tlingkhawm hi 364 tehreng a tling.
Medal table-a pa-hnihna luahtu Japan kutah gold 48, silver 62 leh bronze medal 67 nen a vaiin medal 177 an la tling a; pathumna South Korea kutah gold medal 39, silver 55, bronze 89, a vaiin medal 183 a lut.
Satwik-Chirag kutah gold
Inrinni khan Satwik Sairaj Rankireddy leh Chirag Chandrashekhar Shetty tangdun chuan India tan a vawikhatna atan Asian Games badminton gold medal an awrh a, kum 41 chhunga men’s doubles bika India medal lak vawikhatyna ni nghalin, kum 1982 Asian Games-a Leroy D’sa leh Pradeep Gandhe inkawpin bronze an lak hnua he inelna huanga India medal hmasaber a ni.
Star men’s doubles pair Satwik-Chirag hian final-a an khingpui South Korean pair Choi Solgyu leh Kim Wonho lakah straight-game hnehna changin, world number 3 pair hian men’s doubles world ranking-a 15-na luahtu South Korean pair lakah hian 21-18, 21-16 hnehna an chang.
Kumin March thla khan Satwik leh Chirag in-kawp hi kum 58 chhunga Indian zinga Asian cham-pionship title la thei hmasaber an lo ni tawh bawk.
India badminton team hian kumin Asian Games-ah hnuhma lian hnutchhiahin, he inelnaa an chetthatber hun an tawngbua a, men’s doubles gold bakah men’s team silver leh men’s singles bronze medal an sualchhuak.
Kum 2018 Jakarta Games-ah khan badminton inelna bikah India chuan silver leh bronze pakhat ve ve dawngin, Hangzhou-ah hma an sawn hle a; naktuka tihchhuah tur BWF ranking tharah Satwik leh Chirag hian world no. 1 team nihna an chan phah dawn nghe nghe.
Satwik leh Chirag inkawp hian 2022 Commonwealth Games gold, 2022 Thomas Cup title leh 2022 World Championships bronze an lo dawng tawh a, he’ng bakah hian kumin chhungin Asia Championships gold, Indonesia Super 1000, Korea Super 500 leh Swiss Open Super 300 title an la bawk.
Hockey gold nena Paris Olympic khel tur India
Zirtawpni Asian Games men’s Hockey final-ah India chuan 5-1-a defending champion Japan sawpin gold medal an hlawhchhuak a, Hangzhou khuaa an hlawhtlinna avang hian India mipa hockey team chu nakkum Paris Olympic hockey inelna hmachhawn turin an tling nghal.
Indian men’s hockey team hian Hangzhou hma chiaha Asian Games hnuhnungber Jakarta-ah khan bronze medal an awrh pha chauh a, kumin-ah erawh gold lakirin, he khaw-mualpui Games-a an vawili champion-na ni tawhin, 2014 Incheon edition hnu lama gold an lak vawikhatna a ni thung.
Hangzhou leh Incheon baka India kuta mipa hockey gold medal a luh tum dangte chu kum 1966 leh 1998 kha niin, Bangkok khawpuiin Games a thlen tum ve ve a ni nghe nghe.
Kumina pathumna inchuhah 2-1-a a thlengtu ram China hnehin South Korea chuan bronze medal an chang.
Zirtawpni gold medal match-ah Indian captain Harmanpreet Singh chuan penalty corner ve ve atanga goal hnih thunin, Amit Ro-hidas, Manpreet Singh leh Abhishek-te’n goal khat diat diat an thawh ve bawk.
Harmanpreet hian a pumpuiah goal 13 thunin, India tana kumin Games-a goal khung hnember a ni a, striker Mandeep Singh aiin goal khatin a chungnung.
Japan goal neihchhun hi penalty corner atanga Seren Tanaka tihluh a ni.
Hmeichhia pathumna
Mipa team-in champion lai hneha gold an awrh laiin Lalremsiami telna India hmeichhe hockey team pawhin defending champion Japan tho lakah 2-1 hnehna an chang a, mahse, anni hi chuan bronze medal an lungawipui mai a ngai thung.
World ranking-a pasarihna luahtu Indian women’s hockey team hi champion tura rinkai ni chungin Hangzhou-ah an inlan a; semi-final lamah karliamta Ningani khan Games thlengtu China chuan sili fai tehrengin an sawp a; Inrinnia pathumna inchuh match-ah Jakarta 2018-a sikhat faia an ngam loh Japan lakah phuba an la ve ta thung a ni.
Tun kha India hmeichhe hockey team tan Asian Games medal pasarih an lakna leh bronze medal bikah chuan an vawilina a ni.