India in Gold Medal 6 lak belh

19th Asian Games neih mek chu Pathianni kha a ni 14-na a ni a. A ni 14-ah India in Gold Medal paruk ngawt a lak belh a, a che tha hle. India hian a pumpuiah medal 107 zet a la tling tawh a, Asian Games-a a chetthat tum a nih a nem nghet deuh deuh zel.
Pathianni khan India tan Jyothi Surekha Vennam chuan Thal kahah Gold Medal a la a. Ojas Deotale-a’n mipa thlal kahah Gold Medal kapchhuak bawkin, Kabaddi-a India hmeichhia leh Mipa team, Cricket-a mipa team leh Badminton-a Indian tana inkawp Satwiksairaj Rankireedy leh Chirag Shetty ten Gold Medal an la bawk. India hian Gold Medal 28 a la tling tawh a, palina an ni zui zel.
Pathianni vek khan India hian Silver Medal pali an la bawk a. Silver medal an lakna te hi Abhishek Verma (Men’s individual compound archery), Chess team (Women & Men’s chess team) leh Deepak Punia (men’s wrestling freestyle 86kg)-ah te a ni. Silver medal pali bakah hian Bronz medal pahnih an lak belh bawk. He thu buatsaih lai thleng hian India hian Gold Medal 28, Silver Medal 38 leh Bronz Medal 41 a la tling tawh.

Asian Games Hangzhou 2022 Medals Tally (Top 10)
COUNTRY GOLD SILVER BRONZE TOTAL
China 201 111 71 383
Japan 52 67 69 188
South Korea 42 59 89 190
India 28 38 41 107
Uzbekistan 22 18 31 71
Chinese Taipei 19 20 28 67
Iran 13 21 20 54
Thailand 12 14 32 58
Bahrain 12 3 5 20
DPR Korea 11 18 10 39