Kar tawp football hnuhma

London club lian Arsenal chuan English Premier League-ah vawi 12 ngawt an hneh loh zawn tawh Manchester City an hneh ve ta nawlh. Real Madrid tan Jude Belling-ham a chetha tluang zel a, Real Madrid tana goal thuntu ropui Cristiano Ronaldo record a tluk ta hial. German Bundesliga lama hmahruaitu chu champion lai Bayern Munich ni lovin, Bayer Leverkusen zawk an ni. Serie A lamah goalkee-per lar thar hluai a awm a, amah chu forward Gioroud a ni. MLS lamah Lionel Messi inlan leh thei tan mah se Inter Miami in tlawm an pum-pelh thei chuang lo. Kar tawp football hnuhma kan thir kual leh ang.
English Premier League
Pathianni zana inkhel ngaihven hlawh takah Arsenal chuan Emirates Stadium-a an mikhual Manchester City chu hun tawp dawn hnaiha Gabriel Matinelli goal thun hmangin an hneh. EPL-ah bik Arsenal hi City lakah vawi 12 ngawt an tlawm zawn tawh a, an ngam loh zawn ngat ngat lakah an chak ve ta nawlh a, hun chhinchhiahtlak an tawng a, champion turin inrintawkna sang zawk an neih phah.

Si khat faia Arsenal an ngam loh tum hian Manchester City in vawi li chauh shot an nei a. Hei hi Pep Guardiola enkawlna hnuaiah City in shot an neih tlem ber tum a ni.

Pathianni zan khan Liverpool forward Mohamed Salah chuan Brighton an hmachhawn tumin goal hnih a thun. Salah hian EPL a Brighton an hmachhawn hnuhnung vawi 13-ah goal riat a thun a, assist vawi li nei bawkin goal 14-ah a inrawlh. Brighton an hmachhawn tumin goal a thawkchhuak thei viau a, Aigupta tlangval hian Brighton lakah aiin Manchester United lakah goal a thawkchhuak thei zawk tlat thung.

Inrinni zan khan Manchester United chuan Old Trafford-a an mikhual Brentford lakah si an phur reng a, hun pek belh tawp dawn lama Scott McTominay goal hnih thun hmangin an hneh thei hram. Brentford an hneh let hi EPL-ah United in minute 90 hnu lamah si la phur chunga hnehna an chan let vawi khatna a ni. United chakpuitu McTomminay kha hun pangngai tawp hnuah United tana goal hnih thun thei hmasa ber a ni nghal bawk.

EPL 2023-24-ah London hmar veng club lian pahnih Arsenal leh Tottenham in bul an tan tha viau a, khelh riat atanga point 20 ve ve hmuin pakhatna leh pahnihna a ni mek. October 19, 1984 hnu lamah Tottenham leh Arsenal table chung pahniha an awm dun vawi khatna a ni.

Inrinni zan khan Tottenham chuan Micky van de Ven goal thun hmangin Luton Town an hneh. Micky van de Ven hi Tottenham tan goal thun thei 167 na chiah a ni a, Tottenham hi player hrang hrang goal thun thei ngah ber an ni tel bawk. EPL club zingah Newcastle United leh West Ham tan player hrang hrang 166 in goal an lo thun tawh a. Tottenham hian record thar an siam ta a ni.
Spanish La Liga
Inrinni zanah Real Madrid in si li faia Osasuna an hneh tumin Jude Bellingham chuan goal hnih a thun. England rawlthar hian Real Madrid tan a khelh hmasak vawi 10-ah goal 10 a thun tling tawh a. Hetiang lo ti hmasa tu Cristiano Ronaldo record a nih rual. Bellingham hian season thara inelna hrang hrangah goal 10 a thun tling der tawh a, Europe top 5 league-ah goal thun hnem pathumna niin a chungah hian Stuttgart forward Serhou Guirassy leh Inter Milan forward Lautaro Martínez te an awm.

Pathianni zanah Granada nen an inhnehtawk tawk tumin Barcelona rawlthar Lamine Yamal chuan goal a thun. Yamal hi kum 16 leh ni 87 a upa a ni a. La Liga-a goal thun thei naupang ber record duhawm tak a siam. .

Real Madrid forward Vinicius Junior chuan kum 2023 a inelna hrang hrangah goal 31 a thawkchhuak a. Kum 2023 bikah Spanish club player zingah ani aia goal thawkchhuak hnem an awm lo.
Italian Serie A
Inrinni zan khan Juventus chuan Turin-a an elpui lian Torino chu si hnih faiin an hneh. Juventus manager Massimiliano Allegri chuan Torino hi vawi 13 a hnehpui tawh a. Juventus manager ni tawh zingah Torino laka chak hnem Giovanni Trapattoni record a nih rual chiah.

Inrinni zanah Bologna nen 2-2 a inhnehtawk tumin season thara chetha tak Lautaro Martinez chuan goal khat a thun. Martinez hian season thara an khelh 10 atangin goal 10 a thun tling der tawh a. Inter Milan player awm tawh zawng zawng zingah hetiang ti thei patumna niin Giuseppe Meazza (11 in 1935/36) leh Antonio Valentin Angelillo (16 in 1958/59) te hnung a zui.

Inrinni zan vek khan Genoa leh AC Milan te an inkhel a, si khat faiin Milan an chak. He inkhelah hian AC Milan goalkeeper Mike Maignan chu minute 90+8 ah hnawhchhuah a ni a. Genoa goalkeeper Josep Martínez pawh minute 90+13-ah hnawhchhuah a ni ve bawk. European top 5 league-ah Kum 2010-2011 hnu lamah khelh khata goalkeeper pahnih hnawhchhuah vawi khatna a ni.

AC Milan goalkeeper Mike Maignan hmunruak hi forward Olivier Giroud-a’n a hnawhkhat a, Giroud hian hun tawp dawnah save tha zet mai neiin an team a chhanhim a, a chakpui zui ta nghe nghe. Rin loh taka a chetthat vangin Giroud hian lawm a hlawh a, AC Milan in goalkeeper an neih belh ang hiala sawi zui a ni.
German Bundesliga
Pathianni zan khan Bayern Munich chuan si thum faiin Bayern Munich chuan an mikhual SC Freiburg an sawp. SC Freiburg laka an chak tum hian Bayern senior player Thomas Mueller chuan Bundesliga vawi 448 a hmachhawn atangin vawi 322 zet hnehna a channa a ni a. Bundesliga chak hnem Manuel Neuer record a nih rual.

Bundesliga hmahruaitu Bayer Leverkusen chu inelna hrang hrangah khelh 10 chhung tlawm an nei lo zawn tawh a, hei hi kum 1995-96 hnu lama an chet that zawn ber tum a ni.

Stuttgart forward Serhou Guirassy chuan season tharah vawi sarih a khelh atangin goal 13 zet a thun tling tawh. Hei hi Bundesliga record thar a ni a. Bundesliga chanchinah match hmasa pasarih atanga goal 13 thun tling thei an la awm ngai lo.
French Ligue 1
PSG defender Achraf Hakimi chu seaspn thara Ligue 1-ah goal 5-ah a inrawlhtling ta chiah a. Defender zingah top 5 European league-a inrawlh tam record a nih rual.

Messi-Ronaldo
Hliam damkawr Lionel Messi chu Inter Miami in Cincinatti an hmachhawn tumin bench atangin a lut a, si khat faiin an tlawm zui ta tho. Inter Miami hian MLS playoff an khel phak lo. MLS playoff an khelh phak loh vangin Messi hi thla chhung vel zet a awl thei dawn a, hei vang hian a club hlui FC Barcelona chuan loan a hawh tumin hma an la niin tarlan a ni a. La Liga lamah Messi hi kan hmu leh thut mai thei.

Kar tawpah a inlan loh vangin Cristiano Ronaldo thawm a reh