Doja Cat ‘Paint the Town Red’ a la Hot ber

On Oct 11, 2023 10 0

Doja Cat ‘Paint the Town Red’ a la Hot ber
Doja Cat hla hit ‘Paint the Town Red’ chu Billboard Hot 100 (singles) chart-ah a No.1 a, he chart-a a zawna kar thum a No.1-na a ni. Hetihrual hian Jung Kook ‘3D’ featuring Jack Harlow chu top 5-ah a debut ve bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Doja Cat ‘Paint the Town Red’ hian radio airplay-ah ngaithlatu maktaduai 61.8 la nei theiin, stream maktaduai 23.3 leh sales 6,000 a la tling a, hei hi chart-ah a vawi thum nan a No.1 pui leh ta a ni.
SZA ‘Snooze’ chu radio airplay-ah ngaithlatu maktaduai 75.8 leh stream maktaduai 16.5 leh sales 2000 tlingin No.2-ah bawk a la awm a, Radio Songs chart-ah chuan No.3 atangin No.1-ah a invawrh a, he chart-a No.1 a kai vawi khatna a ni.
Taylor Swift ‘Cruel Summer’ chu No.4 atangin No.3-ah a insawn leh hret a, tihian chart top 3-ah hmeichhe zaithiam hlir an lang leh ta a ni, tun thla sarih chhunga top 3-a hmeichhe hlang an lan vawi khatna a ni. Luke Combs-a’n Tracy Chapman hla hlui a cover ‘Fast Car’ chu No.3 atangin No.4-ah a tawlh ve ta bawk.
Jung Kook leh Jack Harlow ‘3D’ chu stream maktaduai 13.6 leh sales 87,000 tlingin, radio airplay-ah pawh ngaithlatu maktaduai 3.1 neiin No.5-ah a debut a, Jung Kook tan he chart top 10-a a hla lang thei pahnihna niin, BTS member zingah Hot 100 chart top 10-a hla pakhat aia tan solo anga nei thei hmasa ber a ni a, Jack Harlow tan he chart top 10-a a hla lang thei palina a ni ve thung.
Chart No.1 hlui Zach Bryan ‘I Remember Everything’ featuring Kacey Musgraves chu No.5 atangin No.6-ah a tawlh a, he chart-a kar 16 chhung No.1 ni thei Morgan Wallen ‘Last Night’ chu No.6 atangin No.7-ah a tawlh a, Gunna ‘Fukumean’ chu No.8-ah bawk la awmin, chart No.1 hlui Olivia Rodrigo ‘Vampire’ chu No.7 atangin No.9-ah a tawlh a, Rema leh Selena Gomez ‘Calm Down’ chu No.9 atangin No.10-ah a tawlh ve ta bawk.