Mai lawngleng hmanga zin thui record siam
Steve Kueny chuan Thawhtanni kalta khan Missouri luiah mai (pumpkin) lian zet mai chu lawngleng anga hmangin mel 38 a thui a inkar a, hei hi Guinness World Records-in mai lawngleng hmanga inkar thui bera a puan mek lai aiin a thui zawk a, Steve Kueny pawhin a document pawimawh te Guinness World Records-in an endik turin a theh lut a, mahse, GWR lam hian official-in record a siam thu erawh an la puang lo.
Steve hian mai lian zet mai pound 1,208 (kg 548 vel) a rit chu a chhung lam ker kuain, a chhunga mihring awm theihna turin a siam a, chu mai chu lawngleng anga hmangin Missouri luiah darkar 11 vel a inkar a, Kansas City atangin zing dar 7:30-ah chhuakin, tlai dar 6:18-ah Napoleon, Missouri a thleng a, a inkar thui zawng hi mel 38 a ni.
Steve hi luiah a inkar lai hian eng emaw a tawh palha tanpui vat thei turin lawngleng eng emaw zatin a zui a ni. Steve chuan a mai lawngleng hi a hmingah Huckle Berry a phuah a, he mai lian hi engtin emawa siam danglam a ni lo a, a chhung a ker kua tih lohah chuan khawih danglam engmah a nei lo.
Nikum khan Nebraska a cheng Duane Hansen chuan a mai pound 846 (kg 384 vel) a rit chu lawngleng anga hmangin mel 37 a thui a inkar a, Guinness World Record-in mai lawngleng hmanga inkar thui berah a puang a, he record hi mel khatin Steve hian a rawn khum ta a ni.
Steve Kueny hian hetiang mai lian chi chin hi 2020 atang khan a tuipui ve chauh a, Dill’s Atlantic Giant an tih ang chi niin, lawngleng anga hman theih tur khawpa lian turin tun nipui chhung zawng a lo enkawl tawh a, kar hnih vel kalta khan a mai rah hi a lo a, an buk hnuah a chhung a ker ta a, a mu la chhuak vek turin minute 45 vel hun a hmang niin a sawi.
Steve chuan, “A chhung kan ker kuak hmain tuiah a lang thei em tih kan en a, khawi lam nge chung lama tang tur te kan hriat hnuah a laiah kan ker ta a ni,” a ti. A mai lawngleng hi record siam tura a thawh chhuah hmain tuiah en chhinna hun pawh a nei hman lo a, a inkar chhung zawng Paddle KC Paddling Club-in lawngleng eng emaw zat hmangin an zui bawk a ni.