Pathian ram a thlenna daltu NDA leh a sangawi zawnpuite – ZPM leader

Kan rama Pathian ram a thlen theihna tura daltu lian tak chu NDA (National Democratic Alliance) leh a sangawi zawnpuite an ni tih ZPM leader Lalduhoma chuan a sawi a. Kan ramah BJP chu a party ang chuan hlauhawm tham lo mah se, NDA zawmtu MNF-in ram leh hnam pawi an sawi niin a sawi.
Nilainia West Phaileng Dinthara vantlang inkhawmah ZPM leader chuan hmasawnna duh mah ila, Pathian tel lo hmasawnna chu a khingbai a, a kim lo, tia sawiin, “Kan ram rorelnaah Pathian ram a thlen hi ZPM hian kan duh em em a, rorelna fel leh thianghlim a awm theih nan theihtawp kan chhuah a ni. Ram rorelnaah Pathian ram a thlen loh chuan Pathian malsawmna kan chunga lo thleng turte kan dawng thei lo a. Pathian ram a lo thlen theih nan chuan kohhran mite hian politics kan luhchilh a ngai a, kan ram inrelbawlna hi kan siamthat ngei ngei a ngai,” a ti.
Kan rama Pathian ram a thlen theihna tura daltu lian tak chu NDA leh a sangawi zawnpuite an ni, tiin, “Kan ramah BJP hi a party ang chuan an hlauhawm tham loa, mahse NDA zawmtu MNF hian ram leh hnam pawi an sawi a, an tih loh tawp tur an ti a ni. Kan ram tana pawisawitute hi kan chhuahsan a ngai,” a ti.
ZPM chuan a chhe lam an sawi tam tia an beih thinna chu Lalduhoma hian chhangletin, “A chhe lam pawh hi sawi a ngai. Kan dinhmun hi a nihna dik tak kan sawi a ngai a ni,” a ti.
Mipuiin sawrkara an duh ni loin sawrkarna siam tura an rin an vote tlangpui thin tih ZPM hruaitu hian a sawi a. Mipui titi leh hawiher ngun taka enin, mipuiin ZPM chu sawrkar turin an ring ber a, hei hi ruling party leh party dang pawhin an pawm nia a lan thu a sawi. “Pathian leh mipui zarah kan sawrkar a nih chuan policy mumal tak kan nei a. Ram pum huap manifesto kan nei a, chumi rual chuan bial hrang hramgin kan mamawh a inang loa, kan candidate-te hnenah pawh an bial chhungah manifesto an neih kan phalsak a ni,” a ti.