Contract leh supply hna hralh chhawn kan phal ve dawn lo – ZPM leader
An sawrkar a nih chuan contract leh supply hna hralh chhawn an phal ve dawn loa, tul bika sub-contract rawih a ngaih pawhin dan ang thlapin thil an kalpui dawn tih ZPM leader Lalduhoma chuan a sawi.
Ningania Khawrihnima ZPM Dampa East Block Conference a hmanpuinaah Lalduhoma chuan inkalpawhna kawng tha zawk kan neih theih nan hma an la dawn a, kum khata thawh theih tura beisei (work schedule) an siam anga, contract hna a tam thei ang ber open tender-in an ko dawn tih a sawi a. Contract leh supply hna hralh chhawn an phal ve dawn lo, tiin, tul bika sub-contract rawih a ngaih pawhin dan ang thlapin thil an kalpui dawn tih a sawi.
Kum 35 chhung state puitling kan nih hnuah pawh kawlphetha kan siam chhuah zat chu a tam ber laiin 26MW a ni a, kawlphetha lei nan cheng vaibelchhe tam tak senral a ni tih a sawi a. ZPM chuan kawlphetha siam chhuah belh turin project pathum, 274MW pe chhuak thei turin hma a la nghal dawn a, electric bill kum 5 chhungin a tisang ve dawn loa, mipui tan bill pek dan awlsam a siam anga, sawrkarin electric bill a pek tlai avanga a chawi belh thin chu pumpelh turin ruahmanna an siam dawn tih a sawi a ni.
Mizoram mipui zaa 60 vel agriculture leh a kaihhnawiha innghat kan la nih avangin kuthnathawktute hmasawnna an ngaipawimawh hmasa ber dawn tih ZPM leader hian a sawi. a theih chin chinah khawl hmanga phaizawl leilet siam, ram awih dan azira terrace bakah huan leh tlangram changkham lo atana neih, ram awih zaa 120 chunglam ramngawa zuah a, ramsa leh nungchate chen nan leh boruak vawngdaitu leh tuihna siamtu atan zuah an tum tih te a sawi.
“Ranvulh lamah hma kan sawn theih nan a huho leh a mimala ran vulh duh tan ruahmanna mumal tak siam a ni anga, mimal ran vulh tawh sa te pawh a tul angin tanpui an ni dawn. Ranvulh tur reng reng inzirtirna leh inkaihhruaina mumal tak pek an ni anga, mi taima hlawtlin tum tak tak chu loan hmanga scheme tha tak ruahman sak an ni dawn,” a ti.
Kum lama upa zawkte inkawmhlimna (Recreation Centre) changtlung zawk leh tam zawk siam an tum thu leh old age pension central-in a kalpui mek bak state sawrkar atangin thla tin pension atan Rs. 1000 an pek belh dawn tih ZPM hruaitu hian a sawi bawk.