PC Court-in hremna a pek HC-in bail-in a chhuah tir

Prevention of Corruption Act special judge-in kum 4 jail tang tur leh cheng nuai hnih chawi tura thiam loh a chantir chu court sang zawka khinlet a nih hnu ah Gauhati High Court Aizawl Bench chuan bail-a chhuah a phalsak a, thiam loh chantir a nihna leh hrem a nihna hi a suspend rih bawk.
PWD hnuaia sum chingpen awm nia hriat chungchangah department hian Mizoram Lokayukta-ah complaint a thehlut a. Complaint-a a lan danin PWD junir engineer C Lalfakawma chu Khawzawl PWD Division hnuaia Rabung to Aiduzawl PMGSY kawng laihnaah contractor Lalroenga hnen atanga thamna cheng nuai 17 laksaka puh a nih bakah sub-contractor Vanhmingthanga hnen atanga cheng nuai 3 laksaka puh a ni a. He puhna hi chhuichian sak turin a ngen a ni.
Lokayukta hian Anti Corruption Bureau hnenah chhuichiang turin a ti a, ACB-in investigation an tih zawh hnuah Aizawl District Court PC Act special judge hnenah chargesheet thehluh a ni. Court-in a ngaihtuah hnu ah 2023 September 4 khan thutlukna siamin, JE C Lalfakawma hi thiam lolh a chantir a, September 5 khan hremna tichhuak zuiin kum 4 lung in tang tur leh cheng nuai hnih chawi turin a ti a. Central Jail-ah dah zui a ni.
Gauhati High Court Aizawl Bench-ah PC Act special judge thutlukna hi appeal a ni a, High Court hian a ngaihtuah hnu ah C Lalfakawma hi bail-a chhuah a phalsak a, PC Act court-in a hremna pawh hi a hlip lailawk a ni.