Vote chhiar hun sawnah CEO-in beisei nei sang

Mizorama MLA inthlan neih tura vote chhiar hun atana Pathianni ruat a nih avanga sawn dilna lut mekah hun sawn a nih beiseina an nei sang tih Mizoram chief electoral officer Madhup Vyas chuan a sawi.
CEO Mizoram hi Thawhtanni khan Central YMA hruaituten an kawm a. MLA inthlan result chhiar hun leh Tripura-a pem Tuikuk vote chungchang an sawipui. CYMA hruaitute hian inthlan vote chhiar ni atana ruat December 3 chu Pathianni a nih avanga Election Commision of India ( ECI) hnena sawn tura tlawmngai pawl hrang hrang, Mizoram Kohhran Hruaitute Committee, Mizoram People Forum leh political party ten an ngen thu an sawipui a. CEO hian anmahni kaltlanga vote chhiar hun sawn dilna lut hi a hlawmin October 13 khan ECI-ah thawn a, thu dawn la nei lo mah se, a hun sawn turin beiseina an nei sang hle tih a lo hrilh.
Tripura-a awm ngheh thlang zawk Tuikuk-te chungchangah Mizoram electoral roll atanga paih vek an nih tawh avangin an ni tan inthlan kaihhnawihah engmah ruahmanna siam a ngai tawh lo tih CEO hian a sawi a ni.