Dawt hmanga sakhuana politics khel lo turin ngen

BJP chuan Congress party chu dawt hmanga sakhuana politics khel tawh lo tur leh thudik politics khel tawh turin an ngen tih an sawi.
BJP Mizoram State thuchhuak chuan Congress party chu sakhuana politics-a hmanga mipui hnena thu thehdarh thin an ni, tiin, development politics sawi tur an hriat loh vangin sakhaw politics chauh mipuia zawrh tur an nei a; sakhuaa chiang inti viau siin, sawrkarna an chan chhungin Skywalk buaina, Zo Carbon chungchang, Bairabi Hydel Project, Lottery Scam leh zu zawrh chungchang chu mipuiin an theihnghilh lo tih a sawi.
Tunlaia Israel leh Palestine Hamas pawl indona chungchangah Mizoram Kristian-ten Israel lam hawi chunga kan tawngtai mek laiin, central-a Congress chuan Philistia (Palestine) zawk an tan chu mak an tih thu a sawi a. Kristiante hmun pawimawh tih chimit duh leh mihring nunna hlu tak, pawisawi lo nunna la duhte lama tang Congress party chu lemchang party an ni tih mipuiin hria se a duh tih a sawi.
India ramin zalenna a neih atanga sawrkarna chelh a, kum 60 chuang Congress party-in a hruai hnu leh, BJP Prime minister Modi kaihhruai sawrkarin kum 9 chhunga India rama development a thlen chu a inthlau tawh hle tih sawiin, ‘India ram chu khawvel hriatah ram thang chak berte zingah a hlangkai a ni,’ a ti. Mizoram mipui chu khawhawi tizau tur leh mi thenkhatten BJP an beihna chu thudik tawk lo a ni tih hre tura an chah thu a sawi a ni.