October 17-ah same-sex marriage chungchangah Court thutlukna

Constitution Bench Chief Justice of India D.Y. Chandrachud kaihhruai chuan October 17 ah hian same-sex marriage pawm tura petition hrang hrang lut a ngaihtuahnaah thutlukna a siam dawn.
He case hi ngaihtuah a nih hnuah May 11 khan thutlukna siam tura tihin a awm tawh a ni.
CJI bakah bench-a thu judge dangte chu Justices Sanjay Kishan Kaul, Justice S Ravindra Bhat, Justice Hima Kohli leh Justice PS Narasimha-te niin Justice Bhat hi October 20-ah a chawl tawh dawn a ni.
He thutlukna siam tur hian ngaihven a hlawh em em a, sorkar chuan same-sex marriage remtihna pek chu a duh lo va, kalpui a nih chuan ngaihhaina hrang hrang siamin harsatna a thlen zawk dawn tiin a sawi a. Centre chuan he thil kher hi chu Court hian Parliament kutah a dah mai tur a ni tiin a sawi bawk.
Centre chuan a hming maia same-sex marriage recognition judicial declaration chuan awmzia a nei dawn lo a ti a. Chutianga pawmna awm ringawt pawh chuan thil kaihhnawih hrang hrang a nei dawn a ni a ti bawk a. Same-sex marriage chu pawm a nih dawn pawhin Special Marriage Act chu gender-neutral-a siamin Parliament-ah zawk sawiho tur a ni a ti bawk.
Sorkar chuan Union Cabinet Secretary kaihhruaina hnuaiah same-sex couples tena nitin nunphung pangngai heng banking, insurance etc. ah te harsatna an tawhte chingfel tur siam ni se tiin rawtna a lo siam tawh a.
Bench chuan sorkar hmalak tumna chu ‘hmalam panna’ tia sawiin a fak hle a, chungte chu same-sex couples tena zalen taka chenhona an neih theih nana pawimawh a ni a ti.
Chief Justice Chandrachud chuan court chuan same-sex couples te pangngai taka an chenho leh chendun theihna boruak siam a nih theih nan leh en hran an tawh loh chuan judicial declaration siam a ngai a ti thung.
Petitioner-te chuan sorkar dinna chu sawiselin ‘tyranny of majoritarianism’ an tihsak a, court chu tang tlat turin an ngen bawk a ni.