Oman vaukama lawng beihnaah Indian thi, sorkarin a dem

Oman vaukama Indian flag tarna bungraw phur lawng beihnaah Indian thawktu pakhat a thi a, mi dang pathum erawh chhanchhuah an ni tih Union Shipping Minister Sarbananda Sonowal-a’n a sawi.
“Indian thawktu 14 chuanna MSV AL JUSUFI hi Oman vaukam bulah boruaka thlawhtir thilin a fuh a. A thawk 13-te chu him takin Omani Coast Guard-ten an chhanchhuak,” tiin Sonowal-a hian X-ah a tar lang.
Minister hian pakhat erawh a hliam tuar lovin lawngah hian a thi tih a sawi a. Gandhar Nahim Ajij-a, Gujarat-a cheng niin a sawi bawk.
Thawhtanni tuka Indian thi nen hian Asia khawthlang buaina kal meka Indian thi chu 23 an ni ta a. India chuan buaina karah lawng leh a thawktute an him theih nan tanghova hmalak a tulzia a lo aupui fo tawh.
Minister hian Oman-a Indian embassy chuan tual chhung thuneitute dawrin mi 13-te awmzui dan tur a ngaihtuah tih a tar lang a. Ministry pawhin dam chhuakte leh thi ruang hruai haw dan tur hma a la mek tih a sawi bawk.
Thawhlehnia external affairs ministry-in thuchhuah a siamah lawng beihna a dem thu leh heng lai bawra boruak tang tak chu tihdaih vat a tul thu a tar lang.
“Heng lai hmuna sumdawng lawngte beih a la ni fo hi a ngaimawhawm tak zet a. Boruak tidaia palai hmanga indawra muanna leh ngialnghehna a awm theih nana hmalak a tul kan ti tak zet a ni,” tiin a sawi.
Ministry hian sumdawng lawng leh civil mite thil beih thin tihtawp a duh thu a sawi a, ‘khawvel tui kawnga zalen taka sumdawng lawng leh sumdawnna a kal theih nan khawvel dan zamte a rang thei ang bera tun din a tul a ni’ tih a tar lang.
February 28-a US leh Israel tang dun leh Iran indona a chhuah hnuah external affairs ministry chuan bungraw phur leh tuialhthei phur lawng beihnaah Indian 22 vel an thi tawh a, Thawhtannia mi nen hian 23 an ni ta tih a sawi bawk.
US leh Iran inkara buaina chhuak mekah hian Indian flag intarna lawng beih hi a tam lo hle thung.
May thla khan Indian ta lawng chu Omani tuipuiah boruak atanga engin emaw a fuh avangin a lo pil tawh a. He thil thleng pawh hi external affairs ministry chuan demin ‘pawm theih loh thil’ tiin a sawi.
Zirtawpni maiah khan Panama flag intarna tuialhthei phur lawng, Indian thawktu 27 chuanna chuan Strait of Hormuz-ah limpet mine a chil a. A khawlpui pindan a kang a, thelh theih hlauh a ni thung.
October 11 khan Strait of Hormuz-ah tho Indian-te thawhna lawng pahnih beih a ni bawk a. Nicaragua flag intarna tuialhthei phur, MT Petro Dolphin hi drone hmangin Sohar, Oman bulah beih niin Indian pahnih chin hriat loh an ni a. Marshall Islands flag tarna, Indian 11 chuanna MT Valthera pawh eng thil emawin a fuh bawk.