Thian tlachhama awm mek Taiwan

Kumin hian Taiwan in national day celebration a neihnaah kum dang zawng aiin ‘Democratic Taiwan’ tih chu a lang tam a.
“Democratic Taiwan hu khawvel tukverhah kan chhawpchhuak tawh a ni” tiin President Tsai Ing-wen chuan Taiwan ram hmeichhe president atana thlan hmasak ber nia office a chhuahsan dawn ni-ah a sawi a.
“Taiwan mipuite chu democratic leh zalen an ni chhunzawm zel ang” tiin a sawi bawk a. Chung te chu island identity a sawi nghehna niin khawvel chuan Taiwan dinhmun diktak chu hria se a duhna a ni bawk.
Taiwan legislature head You Si-Kun pawhin thusawina a neihah, “UK Economist Intelligence Unit te chuan Taiwan chu Asia a democracy number one ah leh khawvel puma 10-naah an dah a ni” tiin a sawi bawk a.
Heng e hi tun hnaia China in a ram bung anga chhiara nasa zawka a nawrna kal zelah pawimawh taka ngaih a ni bawk a.
“Democratic Taiwan tih chu brand angah neih niin a ram mipui maktaduai 23 te chuan khawvel hriata an tlangauna ber a ni a, a thenawm China in chhuh luih a tumna ata him an duh a. Tichung chuan $800 billion chip superpower Taiwan chuan official in thian a nei tlem em em thung.
Taipei in United States nena military alliance an neih laite pawh a awm a, United Nations security council-ah seat a neih laite pawh a awm. Taiwan chu anti-Communist dictatorship anga kalpui niin a rilru ang pu Seoul atanga Santo Domingo, Pretoria atanga Panama City thlengin a thiante an ni thin.
Mahse tunah chuan Cold War hunlaia a thiante chu an bo zo tawh a. Tun hma zawng aiin Taiwan dinhmun chu chhiain Taipei chuan thian tha a mamawh ta takzet mai.
Taiwan hian Africa-ah thian ram pakhat chauh a nei tawh a, chu chu Eswatini niin absolute monarchy ram niin Taiwan presidnet Tsai pawhin King Maswati III hmu turin a kal hial a ni.
Taiwan hian diplomatic allies official in 13 chauh a nei tawh a. Chungte chu an vaiin Cold-war era hunlaia mi te vek an ni.
Kum 1949 a China atanga tlanchhiaa Taiwan a inbenbel hnu khan Generalissimo Chiang Kai-shek chuan Taipei chu US leh Japan te a thian tir a, chung hunlai chu kum 1950 leh 1960 chho kha niin China chu khawvel ram dang nena an inzawmna danchaha a awm lai a ni.
Mahse kum 1972 February thla khan US President Richard Nixon chu Mao Zedong nen Beijing-ah inkawmin kha kha khawvel laka Communist China inhawn tanna a ni ta bawk. Khata tang khan Beijing chuan diplomatic recognition a hmu awn awn a, Washington ngei pawhin 1979 khan a pawmpui zui ta a ni.
Kum 1975 khan Chiang Kai-Shek chu Taipei-ah a thi a, Chinese mainland thunun a tumna chu a thihpui zui ta bawk a ni. Ram tam tak ten Taiwan nena inlaichinna an chhu chat a.
Tunah erawh China chu lian ta em em in a economy pawh turu tak a ni a. Taiwan thian ramte erawh tlem te chauh niin pawimawhna nei thuk pha lo an ni deuh vek bawk.
Mahse Washington chuan China nena inzawmna a siamtha chungin Taiwan erawh a theihnghilh ngai lo thung a, ralthuam tha ber ber billion dollar tel a leitir reng a. Taipei-a American embassy phei chu “The American Insitute in Taiwan” tih hialin a awm.
Chutiang bawkin Japan chuan Taipei chu a ngaihsak em em bawk a, Taipei-ah chuan Japanese restaurant tam tak awmin Tokyo chuan Taiwan chu a ngaihsak takzet bawk. Mahse, an inlaichinna chu official a ni ngai lo thung.
Tun hnaiah China chuan Taiwan chu nawr zim zual zelin military drill a neih khum char char a, Taiwan chuan thian thar siam tum sa teh mahse a che hlei thei chuang der lo.
Chutihlaiin Taiwan chuan thian siam tuma hma la zui ve zel thungin Taipei supermarket a hralh kal ber pawl nia sawi chu Lithuania-made India Pale Ale a ni daih a. He zu hi Lithuanian rum leh chocolate te nena chawkluh nasat niin chumai bakah Taipei chuan Lithuania ah investment $10 million a kalpui hial tur thu a puang bawk.
Lithuania hi Europe ah pawh democracy ram naupang ber pawl niin Moscow thununna hnuaia awm thin tunah erawh nato leh EU-a lut tawh a ni thung.
National day-a thusawina a neihah pawh Taiwan parliament head chuan authoritarian regime te chungchang sawiin, ‘Ukraine atanga Hong Kong, Myanmar atanga Afghanistan’ thlengin zalenna rahbehin a awm zel a ti bawk.
Lithuania mai ni lo Czech Republic atanga Poland, Georgia te pawhin Russia inla lianah hlauhna an nei a, democracy ram te reuh te an nih hlawm avangin authoritarian state lian tak hlauhna an nei a ni.
Kum 2021 khan Lithuania chuan Taipei chu a khawpui Vilinius-ah China-in a dodal chungin “Taiwanese Representative Office in Lithuania” a din a remti bawk a. Lithuania chuan Taiwan chu a milpui anga ngaiin leh amah ang bawka dinhmun derthawnga ngaiin a thlawp tlat tiin sawi a ni bawk.