IOC member thar Michelle Yeoh

IOC member thar Michelle Yeoh
Oscar dawng thei khawpa lemchan thiam actress Michelle Yeoh chu International Olympic Committee (IOC) member thar atan lakluh niin, Ferrari Formula 1 head hlui leh ex-FIA president Jean Todt-a nupui hian Olympian tana IOC member nih zui tluka mangphan tur tha dang a awm chuan loh thu a sawi.
Mumbai khuaa nimin, Thawhlehnia International Olympic Committee meeting chuan Malaysian junior squash champion hlui Yeoh bakah IOC member atan midang pasarih an thlang thar bawk.
Kumin March thla Oscar award sem inkhawmah kum 61 mi Yeoh hian ‘Everything Every-where All at Once’ tih film atangin lemchan khawvela chawimawina hlu berte zinga mi best actress award dawngin, Asian hmeichhe zinga he chawi-mawina dawng thei hmasaber leh awmchhun a ni nghal.
Election result puan a nih hnuah IOC member zat chu 107-ah a kai chho ta a ni.
Member thar zinga khawvel hriat hlawh Yeoh chuan a hringnuna infiamnain hmun a luah reng chungchang sawi-chhuakin, “Mi tuin emaw actress ka nih hun tur min zawh tum kha ka la hre reng mai. Kei chuan ka sawi fo thin zawk chu – actress nih hi ka tum ngai lo a, ka naupan lai atanga ka tum zawk chu Olympian nih hi a ni.
“Ka seilenna kawngah sports hian hmun a chang chho ve reng a, ka infiamna ngainat leh ka buaipui ve thinte chu squash, athletics, swimming leh diving a ni.
“Chuti chunga seilian chu ni mah ila IOC chhungkua meuh ka zawm ve dan tur chu ka suangtuah pha ngai lo a; he chhungkua hi thuk leh nghet taka inthlunzawm tlat niin, duhzawng thuhmun leh ngainat zawng inang an intawm a, inpekna leh ngaihdan thlengin an in share tawn thin. Chutiang chhungkuaa tel ve hi ka mamawh reng a ni,” a ti.
Kum 1997-a tihchhuah James Bond film Tomorrow Never Dies-a Pierce Brosnan (007) hmelma pakhat Chinese secret agent lema a chan atang khan Yeoh hian Hollywood-ah hming chher tanin, khatih lai khan Asia khaw-mualpuiah chuan ‘celebrity’ dinhmun a luah tawh a, Hong Kong lamah thuthmun a rem.
Martial arts movie Crouching Tiger Hidden Dragon pawh a larpui a; 2005 period drama Memoirs of a Geisha leh 2018 romantic comedy Crazy Rich Asians pawh kha lemchan khawvela Michelle Yeoh vawrhsangtu dangte an ni.
Tarlan tawh angin, Yeoh pasal pawm lai Jean Todt hi motor sport thuneitu sang ber FIA president hlui niin, kum 2013 khan motor sport world governing body hi IOC chuan pawmpuiin member-ah a senglut.
Yeoh baka member thar atana an thlanchhuah zingah Israel infiammi zinga Olympic medallist hmasaber Yael Arad te, Hunga-rian businessman leh sports administrator ni bawk Balazs Furjes, Olympic volleyball me-dallist leh Peru rama an politician hriat hlawh ni bawk Cecilia Roxana Tait Villacorta leh German sports entrepreneur Michael Mronz-te an tel.
IOC member thar dangte chu Sweden atangin International Table Tennis Federation president Petra Sorling leh International Skating Union president South Korean Kim Jae-youl an ni.
Tunisian Olympic Committe president Mehrez Boussayene pawhin ex-officio member nihna nen IOC a zawm ve nghal bawk.
Mi pariatte hi nikum Sep-tember thla khan member thar atan rawt an ni a; vote hmanga thlanchhuah an nih hnuah IOC president Thomas Bach chuan an pawl zawm tharte chu hringnun zinkawng hrang hranga tawnhriat nei tha leh thiamna bik nei thiau an nih thu a sawi a, mi inang lo pui pui ni mah se IOC dinna ni kumkhua – sport hmangaihna kawnga thu khat vua, Olympic hlutna vawngnung tlat an nih thu a sawi.