Ngopaah inter border trade siam nan nuai 600 dah tawh

Ngopaa inter-border trade siam nan cheng nuai 600 leh NABARD atangin cheng nuai 800 tihfel a ni tawh a, hemi thawk bawhzui tur hian MNF a sawrkar leh dawn tih Lengteng bialtu MLA Dr L Thangmawia chuan a sawi.
Nilainia Ngopa MNF Campaign office a hawnnaah Lengteng biala MNF candidate Dr L Thangmawia chuan MLA a nih chhungin Saitual to Saichal Road, an biala a hmasa ber turin science leh commerce zirna dahin, higher secondary school provincialize a ni. KLTM school chu theih ang angin MLA fund atangin a pui a; Ngopaah Sub-Centre leh Health Clinic Center, Ngopa Chhimveng Hall leh SDEO office-te tih puitlin a ni tih a sawi. A tlin leh chuan KLTM High School building chu kum thum chhungin an sa zo vek hman dawn tih sawiin, Ngopa BDO office building sakna turin cheng nuai 207 a fel tawh a, kumtharah building thar an nei tawh dawn tih a sawi.
SDO(C) function tha tawhin driver tur lak belh a ni a, building pawh a tling leh a nih chuan hmun dang aia tha in sak an tum dawn tih a sawi bawk.
MNF a sawrkar leh dawn a, Ngopaah hian inter-border trade siam nan cheng nuai 600 leh NABARD atangin cheng nuai 800 tihfel a ni tawh tih Dr L Thangmawia hian a sawi a ni.
“MLA ka nih chhunga ka hmalakna hi kan zavai atan a ni a, lawmman pawh kan zavaia lak a ni. MLA ka nih chhungin in rilru tihnat leh in duh loh zawng tih ka nei a nih chuan in ngaihdam ka dil a, hrileng leh hun harsa tam tak karah kan thawhhonaa a tih tur tih loh ka nei a nih pawhin ngaihdam ka dil a ni,” a ti.