Lok Sabha-ah ‘Thamna hmanga zawhna’?

India Parliament-a inpuh-mawhna leh buaina kal mek ‘Bribe-for-query’ an tih mai ‘Parliament session neih mek laia zawhna pawimawh zawt tura thamna lak leh pek’ chungchanga BJP MP Nishikant Dubey leh TMC MP Mahua Moitra te inkara inpuhmawhna awm chu Lok Sabha Speaker Om Birla chuan Ethics Committee ngaihtuah turin a dah fel ta.
Thawhtanni kal ta khan BJP MP Nishikant Dubey chuan Speaker Birla hnenah TMC MP Mahua Moitra chuan sumdawng hausa Darshan Hiranandani hnen atangin thamna pawisa dawnga a puhna chu ziaka thlenin, ‘Moitra hian sumdawng lian pawl te humhim an nih theih nan anmahni puala zawhna pawimawh zawt turin thamna a la a ni’ tiin a sawi.
Nishikant Dubey chuan he thamna pawisa hnar phal loh tur khawpa tam Moitra leh Darshan Hiranandani te inhlan ruk hi Advocate Jai Anand Dehadrai pawhin a dawn ve thu a sawi bawk a, mahse he puhna hi sumdawng pawl Hiranandani Group te chuan an pha nasa hle thung a ni.
Speaker hnena Dubeya’n ziaka a thlen dan chuan Moitra hian hmanni lawka Lok Sabha-a zawhna a siam 61 zinga 50 te kha chu Adani Group pual liau liau an nih thu a sawi a ni.
Dubey-in NDTV-a report a pek danin Hiranandani Group hian Adani Group hnenah energy leh infra contracts a hloh nasa em ema hei vang hian Moitra zawhna reng reng te hi Hiranandani Group dinhmun lo ngelngheh theih dan tur hlir a nih thu a sawi a ni.