Odisha leh Tripura State ten Governor thar nei

India President Droupadi Murmu chuan Odisha leh Tripura State Governor thar a ruat fel ta. Jharkhan Chief Minister lo ni tawh Raghubar Das chu Odisha governor atana ruat niin Indra Sena Reddy Nallu chu Tripura governor atan ruat a ni ve bawk.
Raghubar Das hi kum 2014 leh 2019 khan Jharkhan Chief Minister a lo ni tawh a, Das hi Bihar leh Jharkhan te Bihar State a la nih lai kum 1995 khan MLA a thlan tlin a lo ni tawh a ni. Vawiin ni thleng hian Raghubar Das hi Jharkhan Chief Minister full term hmang thei awm chhun a la niin, tunah hian BJP national vice President nihna a chelh mek a ni. Hetih lai hian Nallu Indrasena Reddy hi Telangana BJP leader leh MLA term thum (3) lai lo chelh tawh a ni a, BJP party-ah national secretary nihna lo chelh tawh a ni ve thung a ni. Rashtrapati Bhavan thuchhuah sawi danin President Droupadi Murmu chuan State pahnih ten governor thar an nei thei chu a lawm hle a, governor atana ruat an nih angin an hna an zawm ni atangin he State pahnih te tana governor thar an nih nghal ve ve tur thu a sawi a ni.
Das leh Nallu te pahnih governor atana ruat an ni hian BJP-in India ram chhung hmun hrang hranga an party insuihkhawmna kawnga an hmalakna kawng khat a nihzia a ti lang chiang hle a. Governor dinhmun hi dan anga Lalna chelh mai nilo in Central leh State te zawm khawmtu ber a nih avangin an awmna state-a anmahni party tha ti chaktu atan pawh an tangkai thei hle a, hei tak hi BJP chuan hriain an party tana mi tangkai pahnihte chu state pahnih governor tur atan a ruat ta reng a ni.
Das leh Nallu te governor atana ruat an nih chhan hi an pahniha hruaitu tha bik an nihna leh a hun leh hmun azir zela politician inher rem thiam an nihna te hian central BJP hruaitute a hneh hle a. Governor atana ruat an nih hian BJP party chhunga rorelna insiksawi danglam satliah mai kawk loin BJP party politics kalphung thar lian zawk a entir mah a ni.
State chhunga roreltu lu ber ruat chungchangah hian party-in a mi rin ber berte a thlang tlangpui thin a, tuna governor thar pahnih ruat chungchangah pawh hian zawi te tea BJP-in thuneihna an chan theih nana hmanraw pawimawh a ni tih hre chunga an tih niin a lang a ni.