Environment leh Mizoram

Tunhma chuan ‘bar’ thla a han kai dek dek tawh hi chuan boruak a vawt tan mai thin kha a ni a. Tun hnuah hi chuan, a bikin khawpui lamah, ‘bar’ thla chhunga khawvawt ang kha hriat tur a awm tawh lo. Ruah sur hun bi pangngaiah ruah a sur tawh lo va, khaw vawh hunah khua a vawt tawh ngai lo va, a duh hun hunah ruah a sur a, a duh hun hunah khua a kheng a, fur laiin lui tui a kang deuhthaw thei tawh a. Khuarel sana dik tak kha hringfate hian kan duh dan danin kan herh kual kawi nasa lutuk a, tunah chuan khuarel sana herh dik leh tumin thapui thawh a ngaih phah ta.
‘Environment pawimawhzia kan han hriat chhuah ve meuh chuan, kan environment-te hi kan lo suasam chhe nasa hman hle tawh a lo ni’ tiin sawi ila, chu chu thudik tak a ni.
Siamtu khan, mihring a siam hma khan mihringte innghahna tur ‘environment’ kha uluk takin a siam hmasa phawt a. Mihring a han siam khan mihring kutah environment kha a hlan ta kha a ni a. Environment enkawl thiam chu an nuamsa a, a enkawl thiam lo chuan hreawm an tuar a. Tunah phei chuan, khawvel hmun hrang hranga environment suasamna belhkhawm hian ‘global warming’ a thlen ta hial a, keini pawhin kan lo tuar ve ta a ni.
Keimahni, Mizoram chin chauh te lek pawh hi, environment kan dim loh avanga kan tawrh mekna hian min la beng harh hleithei lo niin a ngaih theih a. Tun hnuah hian thalaite hian environment vei nachang an rawn hre chho tan a, a lawmawm hle a. Hetih rual hian, environment humhalhna kawngah sawrkar thuneihna leh thachakna (political will) nena tanrual a nih loh chuan, awmzia a nei thui tak tak thei lo.
Tunah hian sawrkar thar thlang turin kan inbuatsaih mek a ni a, eng sawrkar pawh lo ding se, environment humhalh leh siamthat hi hna hmasaah an dah chat a pawimawh dawn hle a. Duhthusamah phei chuan, political party tinte hian sawrkarna an siam chuan, Mizoram environment chhe mek siam that lehna hi hna hmasa pawl (priority list) ah kan dah ang tiin intiamkamna nei vek thei se a duhawm hle a ni.