CEO hoin inbuatsaihna thlirho

Mizoram MLA inthlanpui atana inpuahchahna chu chief electoral officer (CEO) Mizoram Madhup Vyas kaihhruaiin Zirtawpni khan thlirho a ni.
CEO chuan inthlan langtlang, felfai leh hlawhtling taka buatsaih a nih theih nan thawhhona tha tak chhawmnun zel a tul tih a sawi a. Thil dang zawng aia ngaipawimawh hmasa tur leh inpuahchahna tithuanawp thei thil awm lo tura tan lak tlan a tul tih a sawi.
Inthlanpui atana sawrkar department hrang hrang inbuatsaihna leh hmalakna thlirho niin, hmabak awmte hun bituk chhunga zawh hman a nih theih nan tan lak nise, an ti a. Mizorama Assembly bial 40-ah polling station 1276 a awm thu sawi niin, hmanraw mamawh leh awm ngei ngei tura tih, assured minimum facilities – electricity, inthiarna, tui in tur, wheelchair lawn theihna (ramp) leh furniture chhawpchhuah kawnga hmalakna thirlho a ni.
October 17 thleng khan hengte hi Mamit, Aizawl, Saitual, Khawzawl, Kolasib, Champhai leh Hnahthial district-ah ruahman fel tawh a ni a; district danga hmalak ngai la awmte pawh chak zawka bawhzui nise, an ti.
Polling official leh Central Armed Police Forces (CAPF) personnel-te veivah zung zung theihna tura inkalpawhna siamthat ngai, emergency air ambulance ruahman dan tur, sum dinhmun tlangpui leh dan leh thupek kenkawh chungchang, Vohbik (PwD) te tana benchmark disability certificate pek chhuah leh CAPF tana ruahmanna siamte thlirho a ni bawk a. Tun dinhmunah PwD voter 3300 awm zingah benchmark disability certificate pek 691 an awm a; CAPF company 20-ten Mizoram an rawn thleng tawh. Ruihhlo leh a kaihhnawih man chungchanga hmalak dan pawh thlirho a ni.