Heroin pun chak dan ni….

Kum 2015 khan heroin Kg 4.088 man a ni a; kum khat chhunga Kg 4 man tlin vawi khatna a ni. Chumi awmzia chu, 2015 chhung khan chawhrualin thla tin heroin gram 340.66 man a ni a; chu chu a hma lam kuma heroin man dan nen khaikhin chuan a sâng hle, sawi laih tham a ni.
Kum 7 a han vei leh hnuah, nikum 2022 chhung khan heroin Kg 33.495 man a ni ta a. Chumi awmzia chu 2022 chhung khan chawhrualin thla tin heroin gram 2791 (2.791Kg) man a ni.
Tunah hian 2023 kan hmang mek a, heroin Kg 71.495 man a ni der tawh. Chumi awmzia chu, thla 10 chhung hian chawhrualin thla tin heroin gram 7149.5 (7.149 Kg) man a ni tihna a ni.
Kumina thla khat chhunga heroin man hi nikum thla khat chhunga heroin man let 2.5 thawk a tling ta tihna a ni. Kumin kum khat tlinna tur thla hnih chhung hian heroin hi engemawzat chu man belh a ni leh ngei ang a, heroin man punna hi a hma kum aiin a let thum vel emaw, a aia sang emaw pawh a ni thei dawn tihna a ni awm e.
Mizoram Excise & Narcotics department lam chuan heroin mante hi Mizoram pawna mi tur a tam a, a hlawm lian thama an man phei chu Mizoram pawna mi tur a ni deuh zel tih an sawi a. Mizoramah a ti thar an pung a, heroin mamawh zat a pung tihna a ni lo, an ti bawk.
Mizoram chhunga heroin man chhuah bak hi man chhuah loh tam tak a awm ngeiin a rinawm a, chumi nena han zeldin chuan, Mizoram hi ‘drug trafficking corridor’ lian tak mai a ni ta tihna a ni awm e. Heti taka drug-in min hrut reng na na na chuan, drug ching thar pawh an awm phah ngei ang a. Chutih rualin, ram danga organised group mafia ho anga ralthuam hlauhawm pui pui nena che duh hi an lo chhuak lovang tih sawi a har ta. Chumi a thlen hmaa ruihhlo lo luhna lam hmeh pin dan ngaihtuah hi Mizoram himna tura hmalakna hmasaa neih a, inralrinna dar hi khawn rik char char a hun tawh hle a ni.