Enchhin 2.0 : The President Edition

ZPM Headquarters Executive Committee-in an party Constitution Article 21(1) an siam danglam zulzuiin Val Upa Council chuan ZPM hruaitu thar an ruat a, chu chu nimin khan an puangzar ta a. Chief minister ni mek Pu Lalduhoma chu ZPM President atan ruat a ni ta!
ZPM hian party president leh chief minister nihna chelh kawp chu an kalphung a ni ve dawn lo tih inthlan dawn khan au-hlaah an hmang a, mipui hnenah, ‘kalphung thar enchhin rawh u’ tiin an ngen a. Tichuan, mipui chuan an enchhin ta a, hneh taka thlan tlin an ni a. Sawrkar hotu ber chief minister chuan party hotu ber president chu a chelh kawp ta lo.
Mahse, hun a lo kal a, urhsun em ema mipui hnena an inzawrhna, mipui pawhin ‘an kalphung thar hi a tha viau tak ang a’ tia an vote tlin chhan chu, tunah chuan bawhchhiatin a lo awm ta a, Chief minister kha sawrkar lama hotu lu ber a ni a, tunah chuan party lama hotu lu ber nihna nen a chelh KAWP leh ta a. Chief minister nihna chauh a chelh lai kha – Enchhin 1.0 : The Chief Minister Edition, tiin vuah ila; tunah chuan Enchhin 2.0: The President Edition, tih a lo ngai dawn ta a ni.
Party pakhat inrelbawlna thil a ni a, pawn lam mi tan lo inrawlh ve na tur a awm lo e, kan ti a nih pawhin a dikna chin a awm ang. Chutih ruala kan hriat reng tur pakhat chu, ZPM party hian an Dan pui an siam tha (amend) a ni satliah mai lova, mipui hmaa an inzawrhna, mipui pawhin an thlan tlin chhan kha ‘an bawhchhia’ tihna a ni tel a; chu laiah chuan mipui kan inrawlh theihna a awm ve dawn ta a ni. Mipui inrawlh dan tur hi chu, party office kawta punkhawma aurual dual dual lam a ni ve lo ang a, ‘laikhum zala ka dawn pawhin, a mak…’ tih vel a nih hmel ta a ni!
He thil thleng hian tun hnu zelah pawh Mizoram political history-ah bung pawimawh tak a luah tawh ngeiin a rinawm a. Political party dang chuan president an thlang (elect) emaw, an ruat (appoint) emaw pawh ni se, mipui hnena an inzawrhna a ni ve tlat lo a, an party inrelbawlna a ni mai a. ZPM hi chu a danglam bik a, an party system-ah hian anmahni ngeiin mipui thikthu tihchhiat theihna tur an phum tel miau si a ni.
Nimin khan ZPM President thar Pu Lalduhoma hian thu a sawi nghal a. Pathian meuh pawhin thuthlung a thlak… Thuthlung hlui…, thuthlung thar… Lal Isua ngei pawhin ngaihdan a thlak fo… tih vel a sawi a. “Kan thatna tur zawk nia hriain party thuneitu sang kal khawmin CM leh President chelh kawp tha zawk dawnin a hria a. Tuna kan kalphung thar tur hi kan enchhin dawn a, a that loh chuan a tha zawk hmangin kan kal leh mai dawn a ni..” tiin a sawi bawk. A ngaia let leh a ngai tak tak a nih chuan, Enchhin 3.0: The Restoration Edition, tih te pawh a ngai leh mai thei e.
ZPM Constitution-ah hian, dan siam thatna (amendment) chungchang hi an Dan pui Art 44-ah dah a ni a. Dan pui siam that rawtna a awmin, “Gen Hqrs Executive Committee member 2/3 aia tlem lovin an pawm chuan siam that a ni ang a, thutlukna chu thu tawp a ni ang” tih a ni a. Khawmpui lian rorel pawh ngai lovin mi tlemte-in an siam danglam zung zung thei mai dawn tihna a ni a, hei pawh hi kalphung thar anga ngaih tur nge ni? Mi tlemte rorelna ‘oligarchy’ te hi a pawl pha deuh thuak mai em? Tuna amendment an siam te phei hi chu mi pakhat bik tan liau liaua dan siam danglam (Bespoke Amendment) anga chhal a nuam viauin a rinawm.
Eng pawh ni se, amah chief minister leh party president ni bawk Pu Lalduhoma’n a sawi ang hian, kan enchhin leh poh a ni ang chu!