Vote chhiar ni sawn dilnaah ‘chhanna la dawng lo’

Chief Electoral Officer (CEO) Madhup Vyas, IAS chuan nimin khan press conference kovin, Mizoram Legislative Assembly inthlan 2023 inbuatsaihnaa \ul hrang hrangte Election Commission of India duh dana bawhzui mek zel a nih thu a sawi a. Vote chhiar ni sawn tura dilna chungchangah, ECI a\angin chhanna engmah dawn a la nih loh thu a sawi. Vote chhiar ni atana December ni 3, 2023 Pathianni ruat a nih chungchanga Mizorama political party hrang hrang leh organisation hrang hrang ten Election Commission of India hnena vote chhiar ni sawn tura ngenna an thlen chungchangah CEO Madhup Vyas chuan, vawiin thlenga ECI lam atanga engmah chhanna dawn a la nih loh thu a sawi a.
Vote thlakna hmun ralmuang lo ‘sensitive polling station’ a awm leh awm loh press mite zawhna chhangin CEO Madhup Vyas chuan, tun thlenga hriat theih chinah ‘critical’ leh ‘vulnerable’ polling station 30 vel a awm thu a sawi bawk.
Final Electoral Roll-in a tarlan danin Mizoram puma vote awm zat chu 8,57,063 a ni a; mipa voter 4,13,062 awmin, hmeichhe voter 4,39,026 an awm a. Service voter 4,975 an awm bawk.
Tun dinhmunah, vote thlakna tur polling station 1276 chu ECI hriattir a ni tawh a. Pian phunga rualbanlo persons with Disability (PwD) ten polling station an thlen theihna turin ruahmanna siam a ni bawk.
Inthlan buaipuitu tur polling party 1470, presiding officer,first, second leh third polling officer-te tan training thawhkhatna zawhfel a ni tawh a, thawh hnihna kalpui mek a ni.
Polling station 1276 zinga 765-ah te vote thlak lai webcasting ti tura ruahmanna a ni a. Control Unit atana hman tur Ballot Paper pawh district zawng zawngah a thleng kim tawh a. Kum 80 chunglam leh Vohbik mi 2092 tan Home Voting tih theih tura ruahman a ni tawh bawk.
Venhimna lamah, State Police personnel 3000 bakah Central Armed Police Force (CAPF) section 450, BSF company 10, CRPF Company 5 leh SSB Company 5 ten Mizoram an rawn thleng tawh.
Vote thlak nia hman theih turin Pawan Hans helicopter pakhat Mualpui helipad-ah zing dar 7 atanga tlai dar 4 thleng duty tura ruahman a ni a. State leh District SVEEP ten Young Voters’ Festival, Cycling Rally, EVM Demonstration camp-te an buatsaih a, flyer leh jingle kaltlangin vote thlak tura mipuite zirtirna leh election kaihhnawih pawimawh inzirtirna an nei a. DDK, Local Cable TV channel leh FM Radio-ahte Discussion leh Talk show buatsaih a ni.
District leh State Level-ah Media Certification and Monitoring Committee (MCMC) din niin, Political Advertisement electronic media kaltlanga chhuah turte uluk taka endik thin a ni a. CEO Office Media Cell kaltlangin ‘Young VotersClub/Social Media Influencers Club’ din chhoh mek a ni a; hemi hmang hian social media kaltlangin voter awareness kalpui tum a ni.