Danlo-a pem lutte kan pawm ngai lo ang

Manipur Chief Minister N Biren Singh chuan a sorkar-in an state chhunga danlo-a rawn pem lutte a pawm zam theih dawn loh thu leh a ram leilung fa ten hun kal tawha inlaichinna an neih thin chu an chhawm nun zel tur thu a sawi. Singh chuan Myanmar behchhana hel pawl Chin Kuki Liberation Army (CKLA)-a hel mi pahnih Churachandpur district-a thawhtanni kaltaa man ten May thla tantira chi leh chi buaina chhuakah pawn lam mi an inrawlh tih chiang taka a lantir thu a sawi a ni.
Imphal East district, Andro hmuna projects pathuma lungphum a phumnaah he thu hi sawiin, “Hmanlai atang tawh leh sorkar-in a pawmpui Manipur-a communities 34 ten inlaichinna tha an neih theih nan min tanpui turin ka sawm che u a. Amaherawhchu, ram pawn atanga danlova lo lutte chu ka phallo-in ka pawm theilo ang” tiin a sawi a ni.
Singh chuan ram leilung fa hnam chi hrang hrangte in awmna ethnic park an tih mai Moirang ami chuan Manipur chu hun rei tawh tak atangin hnam chi hrang hrang te inngeih tlang taka chen hona a nihzia a lantir a ni, a ti.
Singh chuan, “Kan buaina chungchang hi Central sorkar-in min lak sak a. The National Investigating Agency (NIA) chuan Manipur buaina chu hnam hnuaihnung leh chungnung zawk te, Hindu leh Kristiante buaina a ni lo tih chiang takin a tarlang tawh a ni.
He buaina chhan ber chu India ram chhungah Myanmar leh Bangladesh atangtein hel pawl an lo lut a, chungho leh Manipur behchhana helhote vang a ni” tiin a sawi. “Thawhtanni-a Chin Kuki Liberation Army atanga hel pahnih man an ni khan state chhung buaina chu pawn lam mite inrawlh vang a ni tih a ti chiang” tiin Chief Minister chuan a sawi bawk a ni.
CKLA hel pawlte hi India leh Myanmar inrina Chaijang an tih vela awm an nih thu chiang taka hriat a ni a, an hnen atang hian silai leh a mu te man a ni. Singh chuan, “Central leh Manipur sorkar chuan pawn lam atanga beihna te an hmachhawn in an do zel dawn a. Venhimna lama thawktute pawh hmun hlauhawm laiah duty tir reng an ni” tiin a sawi bawk.