‘India’ tih chu ‘Bharat’ tiin thlak-NCERT

National Council of Educational Research and Training (NCERT)-in school zirlaibute zir chiang tura a din high-level committee chuan school zirlaibu-a ‘India’ tih chu ‘Bharat’ tia thlak turin rawtna a siam a, ‘ancient History’ tih chu ‘Classical History’ ti a thlak tura rawt a nih thu he committee chairperson CI Issac chuan nimin Nilaini khan a sawi. Issac chuan committee member pasarih awmna ten lungrual taka an thutluknaah chuan Social Science paper-ah nise an ti a, he paper hi NCERT zirlaibu thar tur innghahna pawimawh ber a nih thu a sawi a ni.
Bharat chu hmanlaia a hming a ni a. Bharat tih hming hmanna hi hmanlai lehkhabu Vishnu Purana ah te hmuh a ni tawh a, chung chu kum 7,000 laia upa tawh a ni, tiin Isaac chuan a sawi a ni. Isaac chuan, “India tih hman lar a nihna chu East India Company din a nih hnu leh Battle of Plassey, 1757 hnu ah chauh a ni” tiin a sawi. Tichuan he committee chuan ‘Bharat’ tih hming chu zirlaibu zawng zawngah zirlai zawng zawngin an hman theih turin lungrual taka pawm turin kan chhawp chhuak ta a ni tiin Isaac chuan a sawi a ni. Bharat tih hming hi official taka hman a nih hmasak ber chu sorkarin G20 ram hruaitu a sawm te hnena a thawn chhuah kha a ni a, he G20 hi President atanga sawmna siam niin ‘President of India’ tih aiah ‘President of Bharat’ ti a sawmna siam a lo ni tawh a ni.
NCERT hian school zirlaibu-a zir turte hi National Education Policy – 2020 zulzuiin a ennawn ve zel a. Council hian hun reilote kal ta maiah khan National Syllabus leh Teaching Learning Material Committee (NSTC) ennawntu tur committee member-19 awmna a din bawk a, anni hian curriculum te, textbooks leh class-a zirlai puitu te an huam tel dawn bawk a ni.