Nuggets an chak nghal

Nuggets an chak nghal
October 25, Nilaini zing khan NBA 2023-24 season khelh tan a ni a, season thara inkhel hmasa berah champion lai Denver Nuggets chuan point 119-107 in Los Angeles Lakers an hneh nghal.
Champion lai Nuggets hian team lian LA Lakers lakah bul an tan tha a, quarter khatnaah point 14 zetin an sang fal nghal. Quarter khatnaah khel chhe viau mah se quarter hnihnaah Lakers an insiamtha a, point ngain an sang ve thung. Quarter hnihnaah che tha lo mah se Nuggets hian point 9 a hmahruai chungin chawlhlawk an hmang.
Chawlhlawk hnu lamah Lakers an khel tha chhunzawm a, quarter thumnaah point hnihin an sang zui leh a, Nuggets nen an inkar an tizim leh zual. An inkar a zim zel laiin quarter linaah Nuggets an khel tha ve leh ta thung a, point ngaa hma hruai fal lehin point belh khawmah 12 in an chak a, hnehna nen bul an tan ta a ni.
LA Lakers an hneh tum hian Denver Nuggets player pawimawh Nikola Jokic a khel tha viau a, treble double a puitlin nghal a, point 29 thawkchhuak in, ball sawhlet vawi 13 a dawn bakah assist vawi 11 a nei tling bawk. LA Lakers tana point thawkchhuak hnem ber LeBron James chuan point 21 a thawkchhuak.