Hmeichhia ten mipain hrethiam tura an duh te

‘Men are from Mars and women, from Venus’ te an lo ti hial a, mipa leh hmeichhe inan lohzia sawi an tumna a ni ber. Mipa leh hmeichhia chu kan rilru sukthlek te a inpersan hle a, a bik takin body language leh communication inhriatthiam tawn sakah kan inthlau lehzual.
I nupui emaw ngaihzawng emaw chuan a taksa chetze hmangin emaw, eng entirna (sign) hmangin emaw i thiltihin a tih hlim leh hlim loh te a lantir ang a, mahse, chu chu nangin i lo hrethiam si lo.
Mahse, lungngai suh, hei le, relationship lama mithiam ten hmeichhiain mipa ten hrethiam se an duh em em nia an sawi te kan rawn tarlang e:
1. Hmeichhiain thil a sawi chuan, tha takin ngaithla rawh. Chu chuan i care tih a lantir a ni.
2. A mood fuh loh tum kha a thaltin hunbi vang a ni vek bik lo. A phunchiar viau chuan eng emaw lungawi lohna a nei te pawh a ni thei.
3. Hmeichhia chu titi pui fo rawh. Nupa karah inhriatthiam lohna a awm pawhin inbiak duh loh tih vel hian harsatna a chingfel lova, harsatna chu sawipui a, titi pui zawk tur a ni.
4. Hmeichhe chhungte leh thiante chu i ngaina lo a nih pawhin tihlan loh tum hram hram rawh. Chu chu hmeichhe lawm zawng tak a ni.
5. Hmeichhia chu in chhung sekrek khawiha che vel tura ngaih an ni a, chutiang an tih pawhin an phunnawi lo. Mahse, a chang changa choka kalsan intihhlim ve te pawh an mamawh. Chet khalh ve zauh zauh teh.
6. Ta neih run suh. Hmeichhia chu i bungraw pakhat anga ta neih chi a ni lova, i tlukpui anga i en chuan a hlim viau ang. Chutihrualin a inngah ngamna, a thlamuanpui tham ni turin awm tum ang che.
7. Hmeichhia chuan inchhai vel hi nuam an ti riau, a bik takin mipain a hmangaihna a puan te hian nuam an ti lehzual. I hmangaihna chu tawngka leh chetzia leh thiltihin lantir thin rawh.
8. Hmeichhe hloh theih dan awlsam ber chu dawt hrilh a ni. Chuvangin thudik hrilh thin ang che.