Puk thuk ber lut chhuak

Khawvela sandstone cave thuk ber, km 24.5-a thuk, Krem Puri, Meghalaya-a mi chu Zotrek Adventure Club te’n October ni 23 khan an lut chhuak a, member 30 an ni.
Laitasohum khuaa puk hi zing dar 7-ah an lut tan a, zan dar 8.30-ah an lut chhuak a ni. Laitsohum Tourism Development Society guide mi paliin an telpui.
Guide-te nen an sawiho a, he puk-a lut tawh zingah Mercy Lalpekhlui, Zarkawt, Zotrek member chu he cave lut chhuak tawh zinga naupang ber nia hriat a ni.
Puk luh chhung hian harsatna lian tham tawk an awm lo a, member pakhat oxygen thlachham a buai deuh chu an awm a, amaherawhchu hahchawlin rei lo teah ngai a awh leh a ni.
Zotrek Team hian puk zawn chhuah leh teh lama kum 20 chuang hma lo la tawhtu, Brain D Kharpran Daly chu a chenna in, Shillong-ah appreciation certificate an hlan nghal. Kharpran hian Tenzing Norgay National Adventure Award pawh a lo dawng tawh a, Krem Puri International Team in kum 2018 a survey an neih lai pawha lo puitu a ni bawk.
Zotrek Caving Team hian October 25 khan Aizawl an thleng leh tawh.