Candidate-te account vil uluk turin Banker-te chah

Nimin khan Aizawl District Election Officer Nazuk Kumar, DC Aizawl chuan MLA inthlanpui lo awm turah Aizawl district chhunga bank hrang hrang hotute a kawm a, Candidate-te account vil uluk turin Banker-te a chah.
Candidate te’n campaign nan sum hman theih chin an neih avangin leh felfai leh thianghlim taka inthlanna neih a nih nan candidate-te hausakna leh an sum neih zat zawng zawng puan a ni thin a. Account an neihna bank te chuan candidate te sum che vel lo thlithlai tura phut an ni. DC Nazuk Kumar chuan Mizoram chu khawtlang nun a felfai in, inthlanna kalphung pawh hahdamthlak phah viau mah se, mawhphurhna chelhtute chu inthlahdah loa an tih tur chin theuh uluk taka an hlen a pawimawh thu a sawi.
Expenditure Observer Nayanjyothi Nath pawhin Banker te chu fimkhur taka contesting candidate te account chu vil turin a chah a. Ni tin report pek tur a nih thu te, sum tam tham lut leh chhuak te state pawn atanga transaction tam tham rawn lut leh thildang rinhlelhawm awm thei te uluk taka vil a pawimawh thu a sawi.
Meeting-ah hian Bank hrang hrang aiawhte bakah Income Tax, Police leh sawrkar department dang thenkhat aiawhte an tel a ni.