“Nationalism kengtu MNF a sorkar leh a ngai”

Zirtawpni khan Darlawn-a MNF campaign office-ah he biala MNF candidate Lalchhandama Ralte, minister-in thu a sawi a, Mizo nationalism kengtu MNF an sorkar leh a ngai tiin a sawi.
MNF party chu hnam thuthlung kengtu leh chhawm nung zel tur a nih thu a sawi a, Mizo nationalism vanga piang a ni a, Mizo hnam nihphung leh sakhua venhim chu a mawhphurhna a ni a, a tlanchhe ngai dawn lo a ti a.
“Kan unau, Burma, Bangladesh leh Manipur-a awm te’n harsatna lian tak an tawh lai pawhin MNF sorkar chu an kiangah a ding tlat reng a, sorkar laipuiin kan mite thawn haw tur leh chhinchhiah bikna siam tura min nawrluih viau pawhin MNF sorkar chuan a dodal tlat a, kan unaute hi kan hum tlat a ni,” a ti a. “MNF sorkarin inpui nih tlin taka a hlen chhuah avang hian Zofa hnam hrang hrangte MNF sorkarah hian an thlamuangin an lawm hle a ni. Hetianga kan hnam a insing sak mup mup lai hian Mizoramah hian Zofa hnam hrang hrang te huap zo taka kuah khawmtu tur sorkar a awm zel a ngai,” tiin, “Mizo nationalism keng nung tlattu MNF party hi a sorkar leh ngei ngei a ngai a ni,” a ti.
Tuivawl bial mipuite chu an chhenna inah tlawhchhuaka vote dil vek duh hle mah sela hun a nei tawh lo tih hriatpui a, kum 5 chhunga Tuivawl bial tana a hnawthawh chu Tuivawl bial MLA zel tlak a nih leh nih loh teh nana hmang turin a chah.
“Kum 5 chhung khan kan ram leh Tuivawl bial tan theihtawpin hna ka thawk a, heng ka hnathawh hmang hian min teh rawh u, ka hnathawh hmang hian MLA zel tlak ka nih leh nih loh teh ka cho a ni,” a ti.