MNF-in a intiam ang a ti lo – JP Nadda

MNF party chuan SEDP-a cheng nuai thum sem a tiam chu a ti hlawhtling lo tih BJP National president JP Nadda chuan a sawi.
Inrinnia Chawngtea vantlang inkhawmah India rama BJP hotu ber JP Nadda chuan MNF sawrkarin mipui hnena a intiam ang tihhlawhtlin loh a nei a, chu’ng zingah chuan SEDP-a cheng nuai 3 sem pawh a tel tih a sawi.
Prime minister Modi-a’n central scheme hrang hrang a ruahman – PMGKVY, PMJAY leh PMAY te ang chu ram mipuiin an chhawr tangkai hle laiin, tuna state-a sawrkarna chelhtute avangin Mizoram chuan a chhawr turin a chhawr tawk lo hle tih a sawi a ni.
Sawrkar laipuiin mipui hmakhua ngaia ruahmanna a siamte chu Chakma ADC huamchhunga chengten an dawng tha lo nia sawiin, a bikin inkalpawhna kawngpui leh mipui hriselna atana ruahmanna siam kawngah an hnufualna atanga khaichhuak turin BJP official candidate thlantlin a ngai tih BJP National president hian a sawi bawk.
Tuichawng bial BJP candidate Durjya Dhan Chakma chuan JP Nadda hnenah hian Lawngtlai district hmasawnna atan ‘aspirational district’ a puan a tul thu leh, Tlabung to Longpuighat via Borapansury kawngpui chu double lane-a siam a tul thu a lo thlen a ni.