Cancer leh natna harsa bik enkawl mekte tan sum dah tum

Cancer leh natna harsa zual bik inenkawlna la mekte puihna atan sum an dah dawn tih Congress president Lalsawta chuan a sawi.
Inrinnia Maubawka Congress Thalai Hqrs. buatsaih vantlang inkhawmah Lalsawta hian sawrkarna an chan chuan cancer leh natna harsa zual bik vei inenkawlna la mekte puihna atan kumtin budget-ah cheng vaibelchhe 5 an dah dawn tih a sawi. “Hei hi kan manifesto-ah tarlan a ni. Mizoram budget kan hrechiang a, kan ti thei, a kawng kan hria,” a ti.
Thalai hnathawh neilote tan hna nuai khat an siam dawn a, an theihna leh thiamna hmangin hlim takin ei an zawng tawh dawn tih a sawi a. Sawrkar hnathawk awm lohna chhungkuaten an damloh nikhuaa mahni sum hman ngai loa damdawi ina inenkawlna cheng nuai 15 thleng hman theih health insurance pek an ni dawn tih a sawi a ni.
AAY leh PHH card nei, chhungkaw lu ber hmeichhiate hnenah gas subsidy Rs.750 pek an ni dawn tih a sawi bawk.
BSUP-a chengte in luah hun chhung kum 99 ruahmanna an siamsak dawn tih MPCC president hian sawiin, “MNF sawrkarin kum 15 ah a tih tawi sak a, miretheite dinhmun ngaihtuah lo leh palzutna a ni. Congress a sawrkar chuan kum 99 luah theihin kan siam leh dawn,” a ti.
Kristian-te dinhmun nekcheptu BJP hmanhmawh taka paihthlak a ngai tih sawiin, enchhin tih vel mai maia inkhualtelem hun a ni lo tih Lalsawta hian a sawi.