Box office-ah ‘Five Nights at Freddy’s’ a No.1
Box office-ah ‘Five Nights at Freddy’s’ a No.1
Horror movie ‘Five Nights at Freddy’s’ chuan tun weekend kalta khan North America-ah cinema hall ticket hralhna atangin dollar maktaduai 78 a la lut a, No.1 niin, North America-ah horror movie tlangzarh tawhah opening weekend-a sum la lut hnem pathumna a ni pha a, kumina horror movie tlangzarhah chuan opening weekend-a sum la lut hnem ber a ni ve thung.
‘Five Nights at Freddy’s’ hian US pawn lamah dollar maktaduai 52.6 la lut bawkin, tihian opening weekend a lak luh zawng zawng chu dollar maktaduai 130.6 a tling. He film hi dollar maktaduai 25 senga siam a ni.
He horror movie hi Emma Tammi direct niin, Josh Hutcherson chu secutiry guard chhungkaw pakhat pizza restaurant veng tura thawk lemah a chang a. Mahse, chu restaurant-a an milem dah lian zet mai chu a rawn nung ta tlat a, a sapatal ta chiam mai a ni.
Taylor Swift: The Eras Tour, concert movie pawh a la che tha viau a, dollar maktaduai 14.7 la lut lehin No.2 a la ni a, he concert movie hian kar thum chhungin North America-ah dollar maktaduai 149.3 la lut tawhin, US pawna a lak luh nen chuan dollar maktaduai 203 a tlin der tawh a ni.
‘Killers of the Flower Moon’-in dollar maktaduai 9 la lut lehin No.3 a la ni a, he film hi dollar maktaduai 200 senga siam niin, Leonardo DiCaprio, Lily Gladstone leh Robert De Niro te channa a ni. He film hian US pawna a lak luh nen chuan kar hnih chhungin dollar maktaduai 88.6 a tlin ve ta bawk.
Film tlangzarh thar, sakhaw rinna lam kaihhnawih ‘After Death’-in dollar maktaduai 5 la lutin No.4 a ni.
The Exorcist: The Believer-in dollar maktaduai 3.1 la lut lehin No.5 a la ni a, he film hian US-ah dollar maktaduai 61 la lut tawhin, US pawna a lak luh nen chuan dollar maktaduai 120.4 a tlin ve ta bawk.
Box office top 10:
1 Five Nights at Freddy’s $78,000,000
2 TAYLOR SWIFT | THE ERAS TOUR $14,700,000
3 Killers of the Flower Moon $9,000,000
4 After Death $5,060,815
5 The Exorcist: Believer $3,100,000
6 PAW Patrol: The Mighty Movie $2,150,000
7 Freelance $2,060,000
8 The Nightmare Before Christmas $2,000,000
9 Saw X $1,685,000
10 The Creator $1,000,000