Saudi Arabia-in Fifa world cup thleng ve dawn

Nikum maiah Arab thlaler lum huam Qatar-ah hlawhtling takin leilunga show ropuiber khelh zawh a ni a, Lionel Messi ropui fam-kimna kan thlirliam! 2034 Fifa World Cup thlengtu tur pawh an tifel leh ta a, Arab ram dang Saudi Arabia-ah nghah a ni leh dawn.
Kum 2034 tournament thleng tura chuh tum ve dang Australia chuan Malaysia leh Singapore-te nena inthlentawm dil an rilruk chu Thawhlehni deadline liam hmain an inhnuhdawh thu an puang a, buk chiam ngai loin Saudi Arabia kutah a tlulut ta a ni.
FIFA hian October ni 4 khan kum 2034 world cup thleng tur hian Asia leh Oceania lamah dil duh an awm em tiin hriattirna a tichhuak a, a tawpah diltu awmchhun Saudi Arabia-in an chang ta a ni.
Football Australia (FA) boss James Johnson chuan kum 2034 an han tinzawn chhin hman zuau nain 2026 Women’s Asian Cup leh 2029 Club World Cup lam an tinzawn tak thu a sawi.
Saudi Arabia lam chuan Asia leh Oceania atanga thlen dil duh zawnna tihchhuah a nih atanga tuibur hmuamda pawh tling loah an dil (bid) dawn thu an tichiang nghal a, a tawp thlengin an dil tlang.
Tunhnaia Fifa thukhawm chuan 2030 World Cup inthlen-tawm turin Morocco, Portugal leh Spain a tifel a; World Cup cen-tenary game-ho pawh Uruguay, Argentina leh Paraguay rama khelh turin a tifel nghal bawk.