Inthlan buaipui turte chhuak tan Vote thlak tawh mi sing tling ta

November 7-a Mizorama MLA inthlanpui neih turah polling station hrang hranga duty tur zingah a chhuak hma turte chuan vote an thlak lawk tan a. Hetihlai hian polling station pan harsat tur kum upa lam leh pianphunga harsatna neite pawhin vote an thlak zel.Inthlan buaipui tur, polling official zingah postal ballot hmanga vote thlak dilte chuan October 30 atang khan postal ballot hmang hian vote an thlak tan a. Aizawl district huamchhunga polling official-te pawhin Nilaini khan hmun pali – Govt. Mizo H/S Indoor Stadium, ATI Auditorium MINECO, I&PR Auditorium Treasury Square, SCERT Hall Chaltlang leh PUC Academic Block-V ah training an neih zawh ah vote an thlak a ni.
Polling station-a vote thlak harsatna nei kum 80 chunglam zing ami leh pianphunga harsatna nei (Persons with Disabilities) te chu an chenna inah inthlan buaipuituten kalchilhin vote an thlak tir (home voting) mek a. An ni bakah inthlanpuia duty tur, an duty-na an pan hmaa vote thlakte nen October 31 thleng khan vote 5306 a tla tawh a. November 1 bik khan 6623 tlak belh lehin, heng zinga 1663 hi chechhuak hleithei lo, mahni ina vote thlak ngai an ni a; inthlana duty tur 4960 an awm bawk.
Heti hian mahni ina vote thlak leh duty-na tur neih vanga vote thlak tawh hi mi 11929 an ni a. Home voting hi Nilaini khan Mamitah kalpui tan niin, report a lut hman lo a; Siaha ah pawh report a la lut hman lo. District dang zawngah erawh kalpui tawh a ni.
CEO office Mizoram hmalaknain Nilaini vek khan addl. chief electoral officer H Lianzela hoin official-te tana postal ballot hmanga vote thlak dilna leh vote thlakna tur pre-polled postal ballot paper inhlantawnna hun – chu district hrang hrang 11 ten an nei. He hunah hian district hrang hranga postal ballot buaipuitute bakah political party aiawhte leh security personnel-te an tel a. Hun hman zawh hian tlai khawmuang loin mahni district theuh venhimna khauh tak hnuaiah an pan nghal a ni.