UD&PA leh LMC chhunfin tum thu sawi awm chungchang inhrilhfiah

UD&PA leh LMC chhunfin tum thu
sawi awm chungchang inhrilhfiah
Lunglei NGO Coordination Committee chuan Mizoram sawrkarin Lunglei-a Urban Development & Poverty Alleviation department leh Lunglei Municipal Council chhunfin a tum nia an hriat an duh loh thu an sawi chu ZPM party chuan inchhunfin ni loa danin a phut anga kalpui tum a nih dan a sawifiah.
Lungleia tlawmngai pawl paruk telna Coordination Committee hian, UD&PA leh LMC chu subject khawih inang an neih ve rualin, inchhunfin kher loin an awm hrang thei reng a ni tih a sawi a. UD&PA leh LMC inchhun fin a nih chuan Lunglei khawpui hmasawnna project hrang hrang a nghawng thei a, UD&PA nihphung leh mawhphurhna pawh a tlahniam thei tih a sawi a ni.
LMC chuan sum thawh chhuah leh technical staff leh ministerial staff lamah mamawh a la ngah hle a. Heng indaih lohna hi UD&PA staff-te hmanga hnawh khah mai a remchang lo tih sawiin, census town leh notified town enkawl chungchangah leh, state sawrkar administrative machinery hnuaia department pawimawh tak leh dan hmanga din tualchhung sawrkar chhunfin chu a rem loah an ngai tih a sawi bawk.
Hei hi ZPM Gen. Hqrs. chuan chhangin, LMC hi India danpui phut anga mipui siam, mahnia khawpui inrelbawlna hranpa nei tura din (urban local body) a ni a. Chu chu sawrkar laipui leh state dang pawhin khawpui enkawl kawnga inrelbawlna an kalpui dan a ni vek tawh tih a sawi.
District Urban Development Office (DUDO) hi UD&PA department hnuaia khawpui inrelbawlna hna district level-a enkawl tur a ni a. Mizoramah chuan khawpui enkawltu urban local body (ULB) kan neih chhun chu Aizawlah AMC leh Lungleiah LMC an nih avangin, district khawpuiah DUDO office neih a la tul tih a sawi a. Sawrkar laipui Ministry of Housing & Urban Affairs chuan India ram khawpui hrang hrang inrelbawlna leh khawpui hmasawnna atana sawrkar laipui scheme kal reng reng ULB awmnaah chuan an kuta awm vek tura a tih tawh laiin, Mizoramah ULB kan la neih mumal loh avang leh kan ULB te la ding tir deuh, an nih tur ang taka thuamthat an la nih loh avangin heng scheme leh hmasawnna programme hi district-a DUDO office-in an kengkawh rih tih a sawi a ni.
‘Hei hi sawrkar laipui kalpui dan a nih tawh loh avangin buaithlak chin a tam hle a. UD&PA-in DUDO kaltlanga scheme leh hna a kal pui tam tak hi ULB kutah a tahtawlin sawrkar laipui duh dan angin hlan chhoh zel tum mek a ni. Tunhnaiah Lungleiah LMC kan neih tak avangin, khawpui enkawl hna pawh a thawktu dik tak an kuta hlan turin inbuatsaih a ni a, peih thawkhat ni tawhin, Aizawl ang thoin Lungleiah DUDO office pawh a awm zel a tul ta lo ni,’ a ti.
Sawrkar laipui atanga khawpui enkawlna tura schemes lokal pawh ULB enkawl tur a nih angin, DUDO office-in LMC kuta lut turin a ruahman a. Scheme-in a kentel staff ho pawh a scheme awmna lama kal mai tur an nih avangin LMC chhungah an awm mai dawn tih a sawi a ni.
‘Lunglei NGO Coordination Committee leh Lunglei mipui thil nih dan hrethiam a, pawm thiam turin kan ngen a. Sawrkar hmathlir tihlawhtling tura sawrkar an lo thawhpui thin angin, he ruahmannaah pawh hian thawhpuiah kan sawm a ni,’ ZPM thuchhuah chuan a ti.