BJP nen khera sawrkar siam kan tum lo hulhual – K Sapdanga

An MLA neih zat chu eng ang pawhin laklawh mah se, BJP nen kher chuan sawrkar siam dun an tum lo hulhual tih ZPM working president K Sapdanga chuan a sawi.
ZPM working president chuan mipuiin sawrkar hmel thar hmuh an nghahhlelh chhan chu kalphung thar mipui sawrkar enchhin an duh a. Mipui tinzawn hi sawrkar intawm (coalition) a ni loa, jentail-te nena inpawlh sawrkar phei chu an tinzawn lo lehzual tia sawiin, “House-a member kan neih zat hi eng ang pawhin laklawh palh se, BJP nen khera sawrkar siamho chu kan tum lo hulhual. Ram rorelnaa Pathian ram tundin intiam, corruption laka fihlim tura intiam ngam awmchhun hi a hlanga sawrkar siam turin mipuiin enchhin an duh niin kan hria a, chu chu tihhlawhtlin kan tum,” a ti.
Tunhnai lawka Manipur Police commando-ten Zofa unaute chen khawmna khawpui Moreh leh a chhehvel rikrapa in an hal leh hmeichhiate pawh kut an thlak thar leh tih Indigenous Tribal Leaders Forum-in a sawi chungchangah, NDA sawrkar, NEDA sawrkar ni bawkin, sawrkar commando meuh hmanga Zofa unaute ralpui beih taka an bei a, hmeichhiate a mualpho thei ang bera hmang a, sakhaw hmun thianghlim apiang an bitum chat chat mai chu a runthlak zozai ta hle tih K Sapdanga hian sawiin, “Mizoramah ZPM sawrkar a din hnu pawha NEDA hoin kan unaute an la sawisa chhunzawm zel a nih chuan, ralkhat atanga kut kuangkuaha thlir ngawt kan tlin ve pek loang, a hen tawk tala kan unaute thlavang kan hauh ve pawhin, min dem bik lo turah kan ngai,” a ti.
BJP Meitei sapatal vanga Zofa unaute tawrhna rapthlak tak a hmuna tlawh awm taka ngaih, la tlawh lo awmchhun chu Pu Modi leh Pu Zoramthangte deuh chauh an ni tawh nia a lan thu pawh sawiin, ZPM a sawrkar a nih chuan, Manipura Zofa unauten Mizoram sawrkar hotute hmel an lo hmu thuai dawn tih a sawi. Hetiang boruak kara Zofa unaute rilru hliam thei zawnga tute emawin dawta ZPM chu Meitei BJP hnen atanga sum dawng tawh leh, la dawng leh tur ni awma thu phuahchawp leh thehdarh a ni chu pawi an ti hle tih a sawi. Cyber Crime-a an zualko naah, chhui chhuak tura an ngenna an lo hnar chu pawi a tih thu pawh sawiin, nunna atana hlauhawm thei dawt phuahchawpa thehdarhtu chu ngaihdam atan tal pawh chhuichhuah an duh tih a sawi a ni.
Zawhna chhangin ZPM hruaitu chuan, Cyber Crime-in an thu thehluh tum hi chhuizui thei lo mah se, court lama kalpuiin Ningani vek khan Aizawl District Court chief judicial magistrate hnenah complaint an thehlut tih a sawi a ni.

ZPM working president thusawi dang:

4Tum dang ang thoin vote lei nana sum chelek tum an awm tih a hriat a. Sum chelek nasat zualna tura ngaih chu Aizawl khawpui chhunga bial pahnihah leh ramri hrul kual zei zeia bialahte a ni.
4Sum hmanga inlei tlin tumte hian sim tawh se kan duh a. An sim thei ngang lo a nih pawhin, mipuiin suma siam sawrkar din phal lo a, suma siam MLA tlin phal lo turin kan ngen.
4Thlai thar policy, ziaka fel taka kan dah hi, mipuiin an hrechiang tawha kan ngaih vangin, kan sawiri khat deuh a. Kan khingpuite atangin sawhthing leh a dangte sawi ri zing deuh tura fuihna kan dawng a; kuthnathawktute dinhmun hima dah turin ZPM sawrkar chuan a budget session hmasa berah sum a dah dawn.
4Mizorama MLA inthlanpui apiangin, mipui hriatthiam turin politics thli a tleh ziah a, thli kengtu party apiang hneh takin an tling thin. ZPM party hi kan khingpuite pawh hian, tun tum chu thli kengtuah min puh rawn.