Inthlan buatsaihtute an lawm

MLA inthlanpui buatsaihtu Election Commission of India leh state Election department chuan Mizoramah tluang tak leh muanawm taka vote thlak a ni chu lawmawm an tih thu an sawi.
ECI thuchhuak chuan, Mizoramah kum bithliah hrang hrangten phur leh hlimawm ti taka an aiawh tur thlanga ‘Democracy Kutpui’ an hman thu a tarlang a. Inthlan muanawm, dik leh fel neih a nih theih nan ruahmanna tha taka kalpui a ni tih a sawi.
Mizoram Election department chuan ECI duan inkaihhruaina, Supreme Court thupek leh dan hrang hrang tha taka political party-te, candidate-te leh mipuiin an zawm avangin lawmthu a sawi a. Vote thlak tura mipui zirtir kawnga thahnemngai taka thawktu zawng zawng chungah te, inthlan hlawhtling tak buatsaih a nih theih nana hma latu sawrkar hnathawk leh a bikin mahni dikna leh mawhphurhna hlentu khua leh tui vote thlaktute chungah lawmthu a sawi a ni.
‘Inthlang ram kan nih angin tun mai ni lo, nakin zel pawha tawiawm turin mipui kan sawm a. Mipui rorelna – democracy mawina leh hlutna chawisan zel a nih theih nan theihtawp chhuah turin kan chah a ni,’ a ti.