Tlawmngai pawlte’n vote chhiar hun sawn chungchangah ECI ngaichang

Mizoram Kohhran Hruaitute Committee (MKHC) kaihhruaiin Mizorama pawl leh political party hrang hrangte’n Mizoram inthlan vote chhiar hun sawn turin Election Commission of India (ECI) an ngen a, hemi chungchang hi tlawmngai pawlte’n hma zuiin, ECI hi an ngaichang mek.Ningani chawhnu lamah khan tlawmngai pawl hrang hrangte intelkhawmna NGO Coordination Committee an thu a, ECI ngaihchan phawt ni se tiin an rel. Hemi chungchangah hian mi pawimawhte an kawm kual nghal bawk.
Ningani khan MKHC hruaitute’n Mizoram Chief Electoral Officer (CEO) an hmu a, CEO hnenah hian MPF leh political party panga, MNF, Congress party, ZPM, BJP leh AAP te’n ECI hnena ngenna an thlen leh. Hemi hnu hian MKHC chuan NGO Coordination Committee kutah a dah zui ta a ni.
CEO hi kar liam ta Zirtawpni-a Delhi-a zin tur niin, MKHC, MPF leh political party-te ngenna hi kena ECI hnena thlen a tum a, mahse Muallungthu-ah vote thlak that a ngaih avangin a zin thei ta lo a, tun karah a zin dawn a, chu chu tlawmngai pawlte chuan ngaihchan an tum ta a ni.
Vote chhiar hun tur hi December ni 3 a ni a, hemi ni hi Chawlhni a nih avangin MKHC kaihhruaiin pawl hrang hrangte’n sawn turin an ngen a ni. Inrinni leh Chawlhni ni lo ni danga sawn turin an ngen.
MKHC hruaitute leh NGO Coordination Committee hruaitute hnenah CEO hian theihtawp a chhuah tur thu hmaichhanah ECI hotute a ngen tur thu te a sawi tih thu dawn a ni.
NGO Coordination Committee lam hian CEO an titipui tawh a, chief secretary leh police hotu lam an kawm tawh bawk. An hruaitute chuan hmachhawp lian han sawi tur a awm loh thu leh ECI an ngaihchan phawt thu, an kal zel dan tur chu a tlachawpa an ngaihtuah tur thu te The Aizawl Post an hrilh.